بسم الله الرحمن الرحيم
اليوم موضوعنا ريفيو و ياحبي في الريفيوهات أنا , بما أنه الصيف قرب و الجو بدأ يقلب و راح الثلج ( ماشاء الله بأمريكا و انا ما أعرف ههه ) و بتطلع الدهون على السطح قررت أعملكم ريفيو عن برايمر و كمان من الدرق ستور و موجود بكل مكان .
برايمر و سيروم مثل ماهو مكتوب عليه قوامه كثيف شوي يعني مو سائل مره لونه مشمشي على وردي , من بورجوا أخذته من سنتر بوينت وقت التخفيض سعره 69 ريال / سعودي , فيه 15 مل , مناسب للبشره العاديه و المختلطه , صالح لمدة 12 شهر .
مميزاته / جدا خفيف على البشره كأنه كريم مرطب الصراحه ماكانك حطيتي طبقه على وجهك وفيه كذا بروده يعطيك , ينشف بسرعه أول ماتدهني , , لونه شفاف على البشره , يخفف من مظهر المسامات بشكل خفيف و ينعمها بس مايعبيها , و من ناحية أهم وظيفة و هي هل يخلي البشره مطفيه ؟ نعم , جربته مع كم أساس و جربته من دون بودره ( بشرتي مختلطه مائله للدهنيه ) ولاحظت أنه عدت كم ساعه ما دهن ممكن بعد 4 ساعات أو 3 يدهن الانف شوي , لكن مع بودره ممتاز و يطول , حطيته لوحده مره قلت أجربه في البيت يخلي وجهك أملس و مايلمع , حجمه صغير و مرتب ماياخذ مساحه , و في ضغاط .
العيوب / أكثر شيء ضايقني أنه معطر , جاتني فتره طلعت لي حبوب و على طول حسس بشرتي و بدأت تحرقني و مسحته ماجلست فيه , فا الي عندها حبوب تبتعد عنه تماما , و البشره الي جدا دهنيه أتوقع مابيمسك الدهون لها كثير و اصلا مكتوب عليه للبشره العاديه و المختلطه , البشره الدهنيه تبتعد عنه تماما لانه راح يطلع لها قشور , فا انت اذا فقط التي زون هي الي تدهن و الباقي جاف حطي فقط على المناطق الي تدهن مو كل وجهك .
طريقتي في وضعه / أضع قليل في يدي و أدهن ( مثل الكريم ) منطقة الأنف فقط و أنتقل بعدها للمنطقه الثانيه و هكذا , لمن حطيت ضغطه كامله و وزعته على كامل وجهي حسيته ماتوزع مضبوط و بدأ يقشر ويخرج لانه نشف بسرعه فا أفضل طريقة حطي منطقه منطقه , و أهم شي لا تكثري حطي طبقه خفيفه.
بالنهايه السؤال الي تحبوا تشتري أو لا ؟ حلو و من الدرق ستور يعني لو مافي خيار الا هو يستاهل و يؤدي غرضه , لكن ركزوا في العيوب عشان ماتجيبوا العيد في نفسكم .
 |
| سواتش |
 |
| مثل الكريم ملمسه |
 |
| بعد الدمج |
التقييم /
A
No comments:
Post a Comment
لأي استفسار أتفضلوا...®