السلام عليكم و رحمة الله و بركاته
الريفيو اليوم عن منتج يعتبر الاول من فئته و دائما الجدل عليه كثير أنا أعترف أني من اول يوم شفت صورته في مدونه عزيزه على قلبي كنت دوبي بدأت تدوين دخل قلبي طووالي بس كنت أدخل المحل أجربه و أخرج و على كده لمدة سنه يمكن الي أستفدته من دخولي و خروجي أني لاحظت فرق السعر ليش ما أعرف احسه المنتج الوحيد الي سعره متغير سعره كان بين 225 و يوصل الى 275 فرق الصراحه و الكل بيقول نفس الكلام و مااعرف ليش الصراحه أنا أخذته من مطار دبي من الدوتي فري ب 175 درهم / اماراتي , حجمه 30 جرام , مدة الانتهاء 18 شهر .
اسم المنتج يدل أنه مناسب لجميع ألوان البشرات وأنواعها و هو غلط ما يناسب كل الالوان , و دا أول شي أنا أكرهه لمن منتج يكتب شي و مايسوي نفسه فا دا ينقص من تقييمه من دي الناحيه النقاط كلها و كمان مكتوب أنه قاعده للبرونزر مو برونزر .
أول ماتلمسي ماتحسي أنه كريمي ولا بودره طبعا , مخملي تحسي و هذه التركيبه و الملمس تسمى بالموس أثقل من الكريم تكون , لونه لمن تعملي سواتش يبين برتقالي مطفي يعني مو صارخ بعكس شكله في العلبه , نتكلم عن العلبه كنت دايما أفكر انها زجاج بس طلعت بلاستيك بس راقي وزنه مو ثقيل يجي فوقه غطاء حمايه من أنه ينشف و دا شي جدا كويس فا لاترمي , الصراحه التعليب راقي و حلو و كل من شافه يسأل دا ايش , فيه ريحه عطريه بس أنا عني أحب المنتجات العطريه فا ما أشوفه عيب لكن ماحسسني الحمدلله .
نجي لموضوع يناسب مين ؟ البشرات الجافه بقوه لانه راح يديها نضارهو لكن حتى المختلطه و الدهنيه يقدروا , لون البشره لا بيضه مره يعني بيضه بس مو بيضه بيضه ههه و حنطيه فاتحه , البيضاء مره راح يطلع اورنج عليها و الحنطيه المتوسط حيبان كاظل لازم تحط فوقه برونز بودره حتى يبين .
مميزاته أنه متعدد الاستخدام يعني ما حسيت أهدرت فلوسي , و يعطي توهج , طبعا أنا جربته لمن كنت متشمسه و بان عليه ظل فا كنت أحطه عشان يثبت فا دا شي تمام , أحلى أستخدام له أنه ينقل لون بشرتك من لون الى لونين أغمق من درجتك الاصليه يعني لو أساسك جا أفتح منك فا يغمقه بطريقه طبيعيه جدا , و لو كنت بشكل عام مثلي الان وجهي ابيض من جسمي فا لازم اغمقه شوي حتى لو ماكنت حاطه أساس أحطه بعد الكونسيلر و بعدين بودره شفافه , و أيضا ممكن يكون برونزر / كونتور جدا طبيعي بس أدمجي عدل , حطيته في النادي مع بيبي كريم و وسط الحر و العرق و من غير بودره و صمد الصراحه صح خف شوي ممكن من كثر ماامسح بالمناديل بس خف بشكل عادي مو ملطخ , في البحر و السباحه ماحسيته يجلس كثير الصراحه و برضو يختفي بطريقه عاديه , و كمان جربته للجسم تعرفوا مرات الكوفيرات يحطوا مكياج الوجه اغمق و يسيبوا جسمك لحاله كانه من كوكب أخر , فا جدا حلو أنه تحطي على جسمك و توزعي عدل عدل في الاماكن المكشوفه لو لابسه الوان فاتحه انتبهي , يتحول تقريبا لبودره مو مره بس مايصير يدبك كثير , و أنا بشرتي دهنيه و ناسبني .
عيوبه زي ماقلت سابقا مايناسب الكل لازم تجربي في المحل و افضل انك تجربي عند قريبتك او شي حتى تستخدمي فرش عدله و تدمجي كويس لانه الدمج ضروري لطله طبيعيه , حجمه مو مناسب للسفر , لاتكثري منه أكثر من طبقيتين لانه حيبين و ماراح يندمج مع بشرتك و يبين طبقه شبهه بودريه , و أخيرا أكثر من 230 ما احس يستاهل يعني حاولوا تدوروا على ارخص شي و يكون أصلي طبعا , البنات الي يحبوا الكونتور الرمادي دا المنتج مو لكم, و كالعاده بما أنه كريمي لازم يلم وسخ و شعر .
ملاحظه أخيره يستحسن أنك تستخدمي رذاذ للبشره زي ماك فيكس بلس كا خطوه أخيره .
الفرش الي أستخدمتها كلها من ريل تكنيك , الاستبلينق برش ماحبيتها معاه , الي أحبها معاه فرشه الاساس حقي و اسمها أكسبرت برش .
السواتش الاول طبقتين , و الثاني مره وحده و كالعاده سواتشاتي لازم تتحسن مو عاجبتني بس نفسي يكون الريفيو كامل مع السواتش
التقييم /
C .
No comments:
Post a Comment
لأي استفسار أتفضلوا...®