السلام عليكم و رحمة الله و بركاته
ان شاء الله أول شهر في السنه الجديده كان حلو لكم , مع السنه الجديده حطيت لنفسي طبعا أشياء أنجزها أكثر و منها أني أكتب تدوينه لمفضلاتي كل شهر بإذن اللهو أتمنى أنكم تكونوا مبسوطين بكذا , و مواضيع المفضلات لها نسبة مشاهده عاليه وأنا دايما أستنى أشوف غيري ايش مفضلاته , أنا أحبها لأنها تخليني أراجع شهري كله و كيف كان فا تلاقي نفسك تطلعي الاشياء الي من جد ناسبتك و جلستي تكريريها .
قررت أجدد و أصور المفضلات في توينا ( ايه محل السمك ) كان نفسي أصور شي لمن كنت في البحر مع الرمل و البحر لكن مره وحده نزلت الكاميرا و جوا دبابات البحر و غرقوا الكاميرا مع الجوال أنا اغراضي خرجت سليمه الحمدلله لكن في ناس خربت جوالاتهم للأسف , فا المهم كنت ابغى خلفيه الالعاب عشان تطلع ملونه و جذي بعدها شفت الرمل و قلت هذا هو طبعا ما وراء الكواليس كان نمل و حاجات للبسس كده تطلع و أنا أحفر T_T أخ بس هانت خلينا ندخل في الموضوع من جد .
أول شي طبعا حيكون للعنايه وهو منتج واحد مسكين لكن جميل عباره عن كريم للشعر بعد الاستحمام و قبل تسريح الشعر من شركة ماكديميا هي مشهوره و غاليه كمان أنا ما أشتريتها طبعا لكن أختي أشترته و ماصارت تستخدمه فا أخذته كنت أستخدم كم شي معاه بعدين قلت خليني أوقف و أستخدمه لوحده أو مرات أغير و أستخدم كريم ثاني عشان أشوف أيش صار فرق في شعري فا أحط نص ضغطه و لو شعرك قصير ربع ضغطه تبدأي من الأطراف و تطلعي لفوق يعني المنتج يتركز تحت , أنا أستحمه و أحطه و أظفر شعري لحد ماينشف ماكو سشوار , فا الي لاحظته أنه يخفف نفشة شعري شوي و يخلي هاجد ههههه أنا الحمدلله شعري مو خشن بس برضو من الي يخرجوا بشعرهم الطبيعي , عاد ريحته أخ لمن أشمها أقول ايه كذا خلص استحمامي , و المنتج كبيير و ماتحتاجي الا قليل فا يعني بيعيش عمر .
و ندخل في المكياج الي له حصه كبيره دا الشهر و فيها دمج بين الماضي و الحاضر هههه يعني أشياء قديمه رجعت أستكشفها و أجدد أشيائي .
نبدأ بالأقدم مثل ماهو واضح قدامكم الشدو منحوت و هذا يدل على جماله هذا قصته أخدته من ماما عشان أجرب أستخدمه فا جربته مره و في نفس اليوم قبل ما أنام بتفرج في اليوتيوب فيديو لـ Emilynoel83 على اليوتيوب و فجأه طلعته و بتتكلم عنه أنا كان على بالي ماركه مو معروفه و فجأه تقول كفر قيرل أنا قمت تاني يوم أقرأ عليه و طلع نفسه دورت عليه في وول قرين أمريكا لقيته ب 5 دولار , عاد ماما ماتدري من وين جابته تقولي أكيد من جده ما قد أشتريت من أمريكا مكياج اسمه Shimmering Sands .
هو ينفع لطلة كل يوم او خرجه بسيطه أنا وقت ما اكون مستعجله أستخدمه كأني جلست سنه على عيني هو كله دقيقتين أحط اللون الوردي الي بلمعه على الجفن و تحت الحواجب و كسره العين ادمج اللونين الثانين و أحلى شي الوردي معاه لمعه فضي يعطي أضاءه لتحت الحاجب جمييييله خلاني أفكر أشتري أضاءه ورديه بس أهم شي يكون معاها لمعه فضي مو ذهبي لانه الفضي يخلي اللون بارد و دا الحلو .
الاسم واضح في الصور
بعدها برضو مجموعة بلاشرات من مكياجي أنا طبعا بس لون الي عجبني كنت أدور على لون مايل للموف الين لقيت دا الشي القديم و لونه مظبوط اللون , موف على عودي جدا جميل كان مناسب للشتاء اسم اللون Caprylic بالنسبه للثبات نص و نص .
روج Talk That Talk من ماك أيش أقول على الجمال دا العلبه و لا اللون ولا الحرف فين اوزع حبي له من كثر ماعشقته أدور أي لوك يناسب معاه عشان أحطه حقيقي أكثر روج أستخدمته في المناسبات و أخلط معاه ألوان ثانيه اللون صح مرات ينشف بس قشري شفايفك و حيكون تمام و ثابت بعدين يبدأ يروح من داخل الشفايف ما أبغى الربيع يجي لو نزل في كولكشن ثاني من غير تفكير خذوا , و تكملة الاشكال الحلوه نفس العلبه حق الكولكشن حطيت فيها بودرتي بدل البلاشر بس يكفي أطالع فيها تجيب السعاده هههه .
*ماك ينزل مجموعات ليل و نهار و غالبا تكون أغلى من المجموعه الأصليه فا لو مره عجبك شي شوفي مقاس العلبه تناسب شي من المجموعات الدائمه في ماك عشان لو خلص المنتج مو تجلس العلبه فاضيه تستفيدي منها في شي تاني زي أنا , لكن انا من بدري شلت البلاشر و حطيت بودرتي لانها دايما معي فا خلي دا الشي في بالك مثل البجمنت البودرات المنرلايز الارواج و الشدوهات كمان الي تكون مدوره لكن الي تجي مجموعة خطوط ما أفكر أشتريها لانه ماك مافي شدوهات زي كده ^^ .
البلاشر و البرنزر هذا نزل في مجموعة ريري البرونزر اول ما أستخدمته حسيته خفيف لكن مع الوقت تقدري تزيدي عليه الين توصلي للون الي تبي و ابدا ماهو اورنج و في التصوير يطلع تحفه أنا لمن شفته في صوري حبيته أكثر و أكثر بعد البلاشر لوحده وحش لكن لمن يندمجوا يطلع لون دافي على البشره السمراء ما أتوقع يبان عليهم .
أخر هي مذكرتي حقيقي أي شي في بالي أكتبها فيها لانه قبل كنت أكتب في جوالي و خرب و راح كل شي فا هنا يجلس كل شي مره مريحه و مفيده اكتب فيها ايش أبغى أكتب ريفيو كل اسبوع أو لو عندي عزيمه أحط الطلبات و كذا لاني أنسى فا ارتب كل شي من بدري عشان ارتاح .
مما قرأت أعجبني ...
(( يبلغ الحب القمه متى تنازلت المرأه عن عنادها و الرجل عن كبريائه ))
أونوري دي بالزاك
و سلامتكم و ان شاء الله عجبكم الموضوع و أشوفكم في مفضلات قادمة ان شاء الله و فتحت حساب جديد في تويتر اذا تحبوا تضيفوني RaneemIsm
مفضلات سابقه /
No comments:
Post a Comment
لأي استفسار أتفضلوا...®