بسم الله الرحمن الرحيم
برونزر كثير متحمسين للريفيو الخاص فيه فا خلونا نشوف و نتكلم فيه بالتفصيل , البرونزر متوفر منه 6 ألوان 3 منها بلمعه و 3 مطفيه , حجمه 11 جرام , سعره 185 ريال/ سعودي , تلاقوا باي مكان يبيع ميك اب فور ايفر زي سيفورا , وجووه أو البوتيك الخاص فيهم .
مميزاته , تركيبته الجميله عباره عن جيل موس مثل الزبده تحسي , يندمج مع البشره بكل بساطه و يعطيك لوك برونزي بثواني , النوع الي بلمعه يعطيك انعكاس صحي و لمعه ذهبيه جدا طبيعيه تبان كانها تان صحي , و الحلو فيه أنه ضد المويه يعني بالحر بعز الصيف راح يثبت , أنا أشوفه افضل للبشره الجافه لانها راح تحس أنه الحياه رجعت لبشرتها و تبعد عن اللوك البودري الي ممكن البرنزرات البودريه ممكن تسيبه عليك , جدا جدا مناسب انك تحطي على كامل وجهك اذا كنت تتشمسي مثلا و تسيبي وجهك من دون تشميس مررره راح يفيدك , حتى تقدري تحطي على جسمك ولا حيبان أي خطوط أو تكتل على بشرتك , ممكن تستخدمي كمان أنك تغمقي كريم أساس فاتح عن جسمك بدل ماترمي أو عشان الصيف مع التان تشتري أساس جديد فا دا حيوفر عليك , فا أنصح فيه للبنات الي يحبوا التان لوك متأكده راح تحبوا , علبته بلاستيك عمليه , شكله من الداخل متموج كأنه يخليك تستعدي لامواج البحر و السباحه ههههه , كميه بسيطه منه تتوزع لمساحات كثير , اختاري اللون المناسب لك لانه الغامق ممكن يعطيك على اورنج , صاحبات البشره السمراء راح يعطيهم لمعه و يعزز لون بشرتهم جدا , ممكن البشرات الدهنيه تستخدمه و فوقه بودره حتى يثبت البرونزر و البلاشر اكثر لها .
عيوبه , اول شيء أنه لو سيبتي مكشوف لمده راح ينشف و هذا الي صار لمن البنات راح جربوا بالمحل قالولي اللون مايطلع طبعا لانهم سايبينه مكشوف غير انه كم يد سوت سواتش و سابت دهون و عرق عليه قرفتكم ها ههههه , مو اي فرشه تمشي معاه للاسف جربت معاه فرش كثير أحسن وحده هي الفرشه الي نزلت معاه طلعت لي اللون واضح و توزعه بكل سهوله , بس ممكن تجربي فرشه خشنه معاه أنا كل فرشي ناعمه فا الكابوكي الي نزلت معاه هي الوحيده الي خشنه معاه , جربت معاه فرشة الاساس بحيث اني اغمق درجة الاساس لاحظت اني احتاج طبقات كثير حتى اول للون الي ابغاه لانها الفرشه ناعمه , العيب الاخير الالوان ممكن ماتناسب الكل يعني في ناس حتوقف بالنص بين انه درجه فاتحه جدا عليها و درجة جدا اورنج عليها فا جربي بالمحل قبل ماتقرري اللون المناسب .
نتكلم عن الفرشه الكابوكي رقمها 136 الفرشه مصممه شعيراتها مستقيمه و متموجه و خشنه حتى تطلع المنتج و تلقطه و توزعه على البشره دون ترك أثار بودرة أو
تصبغات على الوجه , و تُوزّع الكمّية
المناسبة على البشرة للحصول على اللون البرونزي , و غير الشكل العام للفرشه و الجهه الخشب الي تحسسك انها مميزه , الفرشه تباع منفصله و سعرها 150 ريال / سعودي .
بالاخير أنا حسيت انه بديل لبرونزر شانيل يونفيرسال يشبهه في القوام مو مره بس يشبهه , و الميزه فيه انه متوفر منه الوان كثير للفاتجين و السمر بعكس برونزر شانيل الي مو متوفر منه غير درجه وحده , فا اذا كنت حابه برنزر شانيل و قوامه بس لونه ماناسبك جربي برونزر ميك اب فور ايفر .
مثل ما راح تلاحظوا من الالوان الي جربتها رقم 35 مناسب للبرونزر و رقم 30 مناسب أكثر للكونتور لانه شوي على رمادي , أتمنى الموضوع فادكم و تكونوا بنهايته قررتوا و عرفتوا هل راح يعجبكم أو لا و سلامتكم .
التقييم /
A
No comments:
Post a Comment
لأي استفسار أتفضلوا...®