بسم الله الرحمن الرحيم
اليوم خلونا نرجع عناية و خصيصا عناية الجسم , قبل فتره مو قصيره اطلقت بودي شوب مجموعة جديد , كنت متوقعتها اصدار محدود و لكن طلعت ولله الحمد موجودة على طول , عندي مجموعة منتجات متنوعة من المجموعة خلوني أشاركم فيها لانها حقيقي تستاهل ينكتب عنها تدوينة خاصه فيها و مفصله لكل منتج , فا هيا بنا نذهب معنا في عالم من الاسترخاء و الاستجمام مع بعض .
المجموعة مقسمة 3 اقسام من مدن العالم المختلفة تحول حمامك الخاص الى منتجع و سبا خاص فيك مجمعة من انظمة الجمال القديمة ( مجموعة للاسترخاء لونها موف , مجموعة إعادة تنشيط البشرة لونها أزرق , مجموعة السعادة لونها أصفر )
و كل قسم فيه مجموعة منتجات مختلفة زي قناع , مقشر , زيت للجسم و اشياء متنوعة .
مجموعة الاسترخاء
هذا المقشر الافريقي فيه زيت مستخرج من شجرة كزيمينيا الافريقة حبيباته صغيره و تقشيره متوسط , معاه كريم مرطب يعني يرطب و يقشر بنفس الوقت و ابدا ماحسس جلدي , ريحته خفيفه و عطرية , تقشيرة ينفع اكثر من مره بالاسبوع بس عني افضل التقشير يكون اقوى فا ماافكر اشتري ثاني , بس الي جسمها حساس انصحها فيه .
كريم الكاميليا اليابانيه المرطبة , فيه زيت الكاميليا و ترطيبه جميل و يعطي نعومه للجسم و ياخذ وقت متوسط للامتصاص , رائحته جدا خفيفه و مناسبه للنهار و الليل , و بالذات لمن اكون مكتومه او مضايقه احطه مره يهديني , و احس بانتعاش بعد حمام دافي , اشتريت من دا الكريم 3 لحد الان كل البيت يحبه هههه لازم تشموا ريحته .
قناع طيني للجسم من فحم العملايا , وظيفته يزيل الشوائب و السموم من البشرة , ينحط بعد ماتقومي بتقشير جسمك و تنظيفه بالشاور جيل , تحطي 10 دقائق لين يجف و تستحمي , الصراحه انا ماحبيته ريحته جدا قوية و موحلوه دوختني و الحمام مكتوم و كمان خلت الحمام كله معدوم و حوسه , ويخلص بسرعه , الصراحه ماراح ارجع اشتري اذا عندك خلق و فيك تصبري مجبسة 10 دقايق اشتري , بس انا اطفش و ادوخ و كمان تنظيفة جدا صعب .
مجموعة إعادة تنشيط البشرة
هذه المجموعة مخصصه لتنشيط جسمك بعد يوم متعب او تتعرضي لاجهاد بشكل متكرر و مافي وقت تروحي لصالون , تقدري في البيت تسوي كل شي و تجلسي مع نفسك و تصفي ذهنك .
هذا اكثر منتج احبه و اشتريت علبتين منه , مقشر ملح البحر الميت ريحته نظافة و نشاط تحسي كانك بالبحر في الهواء الطلق , مره ينفع في البحر و ينعشني مره احب افتحه و اجلس اشمه احس بحيوية , و اكيد ملح البحر الميت فيه منافع كثير زي ما الكل عارف , حبيباته اخشن من المقشر الي قبل و اكبر بس كمان فيه زيت مرطب كانه جلسرين , الزيت هذا يترك اثر دهني على البشره بالنسبة لي حبيته بس غيري شافة عيب بالمنتج , انا للامانه لمن اكون كسلانه و اقشر فيه اعتمد على ترطيبة يكفيني احس جسمي مغلف , فا الافضل تجربي بالمحل قبل تجاذفي , و طبعا ككل المقشرات استخدمي بحركات دائرية على جسم رطب و ندي مو مره مبلل حتى مايذوب الملح بسرعه لو كان مره مبلل .
مجموعة السعادة
هذه المجموعة مخصصه لك انت و نفسك , تعيشي جو و تريحي نفسك و تصفي ذهنك من كل ضغوطات الحياه , حتى تخرجي بعدها بايجابية و روح جديدة , المجموعة ريحتها عطرية دافية من جد تجيب الدفئ و السعادة .
زيت المونوي من بولينيزيا . للجسم و الشعر , اتعب اقولكم ريحته تجنن من اكثر المجموعات الي ريحتها عجبتني تحسيها راقية و دافية , حبيته للجسم اكثر اول مااخرج و جسمي رطب احطه عليه حتى يحبس الرطوبة و يدفيني , يعطي نعومه و لمعان للجسم بشكل جميل , بالنسبة للشعر ماعجبني الصراحه و حسيته نشف شعري فا خليته للجسم و باقي فيه شوية ماابغى اخلصها ههههه .
كريم الكوكوي من هاواي , زيت الكوكوي غني بالاحماض الدهنية الاساسيه و الفيتامينات و حمض اللينوليك الذي يرطب و يغذي البشرة , يجنن يجنن ثقيل و سميك و يرطب من قلب , و ريحته اكيد زي الزيت تجنن و تحسي تبغي تنامي بعد ماتحطي , احب احطه على الاماكن الجافه جدا لانه ترطيبه يجلس كم يوم , ريحته قوية لو كنت مصدعة او مكتومه مااحطه استخدم الكريم الموف لانه اخف , بس الكريم يعيد للبشرة ليونتها و يتركها مشرقة مليئه بالمغذيات .
المجموعة تضم انواع اكثر و منتجات اكثر و حتى في فرش اداة للتدليك , مره انصحكم تجربوا المجموعة او حتى تمروا تشوفوها , مره انبسطت انها مازالت موجوده و انها مره تغيير عن بودي شوب هذه راقية و علبها غير عن منتجات بودي شوب , صح اغلى بس الكمية كبيرة و تعيش معك , و مافيها شي لو بين فترة و الثانية اهديتي نفسك شي يريحك و يخليك تروقي , اتمنى عجبكم اللريفيو و استفدتوا منه , و اكيد وروني اللسته حقكم لو كونتوا ايش تبغوا تشتروا منها , او ايش اكثر منتجك حمسك تجربي .
A
No comments:
Post a Comment
لأي استفسار أتفضلوا...®