تجربتي مع إزالة الشعر بالليزر في عياده د.اسامة الوسية للجراحة التجميلية ( متجدد )

السلام عليكم و رحمة الله و بركاته 

مثل ما وعدتكم و طلبتوا مني في انستقرام  أكتبلكم تجربتي مع الليزر جلسه بجلسه + جلسات الرتوش يعني كل أسبوعين أو شهرياً حيكون الموضوع متجدد بإذن الله .

رقم عيادة اسامه الوسيه بالجيل بلازا ؟
تم تغيير رقمهم الى 0122364541

سبب عملي لليزر ؟

شعري أسود و سميك , يطلع مع الموس من ثاني يوم و لو شلته وهو صغير تتحسس بشرتي لأنه الشفره تصير جنب الجلد , مع الحلاوه يطلع بعد أسبوعين غير الألم و الدم الي ينزل من مساماتي و كنت أعاني بشده لأنه محد يحب يشوف يد بنت بشعر , و لمن تجيني خرجه فجأه أو أحد يجي عندنا البيت فجأه لازم كم طويل و حوسه أتعقدت حقيقي مرره و خلاص نفسي أرتاح .

هل شفت تجارب ناس ثانيه ؟

نعم , و هذا الي شجعني أكثر و أكثر لمن تشوفي بعينك تصدقي .

فين عملتي ؟

بعمله في عياده د.اسامة الوسية للجراحة التجميلية .

ليش أخترتيها ؟

بكل بساطه لرخص سعرها و انهم يعملوا رتوش شامله للسعر , قبل كده سألت في جده الوطني أغلى و كمان من غير رتوش فا الرتوش من حقك لا تروحي عياه تنصب عليك و ماتسوي .

معنى جلسة رتوش  بعد الليزر؟

هي جلسه ليزر تتعمل بعد الجلسه الأصليه بعشره الى 14 يوم بعد كده لو أتأخرت تنحسب جلسه كامله ولازم أدفع , فايدتها أنه بعض الأحيان الممرضه تنسى منطقه أو بعض المناطق يكون طلوع الشعر فيها أكثر و ماتقدر تعيد كم مره على نفس المنطقه بنفس الجلسه فا يعطوك مهله جسمك يرتاح .

كم سعر الجلسه ؟

عرض لديهم الجلسه الواحده بـ 1400 ريال / سعودي , و تكملي تدفعي نفس المبلغ لحد ماتخلصي بنفس العرض و هذه أرخص عيادة لقيتها , فا فرصه حلوه تستمر العروض لنهاية شهر محرم .

تعليمات قبل البدأ بعمل جلسات الليزر ؟

أول و أهم شي توقفي تشميس أنا وقفته لمدة شهرين في حدود فرق اللون بس عادي , ماتعملي حمام مغربي , قبلها بفتره بطلي الشمع و الحلاوه و شيلي بالموس كل جسمك و وجهك حتى الشعره تصير أقسى دا الي أنا عملته , وقعوني على ورقه كانت أنه قبلها بثلاث أسابيع توقفي التشميس و الحمام المغربي بس لمن قريت في النت قبل كانت المده مختلفه من مكان لمكان فا أحتياط لنفسي وقفته أكبر مده ممكنه .

تحضيري أنا قبل الجلسه ؟

قبلها بيوم حلقت شعرجسمي كامل بالموس ماعدا ظهري و وجهي حتى تشوف كمية الشعر فيهم , ما استخدمت جيل حلاقه ولا شاور جيل أبدا لأنه معطر و دا ممنوع , فقط أستخدمت غسول كير فري في المناطق الحساسه لأنه غير معطر , ولو رحتي دوامك لمن ترجعي أشطفي جسمك بالماء فقط أدري الموضوع مقزز بس معليش لأنه ماتبغي تكون عليك ترسبات العرق , بعد الاستحمام نشفي نفسك و لا تضعي أي كريم حتى لو غير معطر لأنه ممنوع .

تعليمات بعد جلسة الليزر ؟

ماتحكي جسمك قدر الامكان و لو أضطريتي بشويش , ماتتعرضي للشمس المباشره و لو أضطريتي حطي واقي شمس قوي و كرري اعادة وضع الكريم كم مره طوال فترة بقائك بالشمس ( لو كان عملك يطلب وقفة شمس أو بالجامعه ) ألبسي كم طويل و حطي في الاماكن الظاهره , ماتستحمي الا بعد 4 ساعات .

                                       ----------------------------------------------------------------------

* جلسة الليزر الأولى *

أتصلت و عملت حجز للساعه 4:30 العصر , رحت قبل الموعد عشان خفت ما أعرف العنوان ,أول ماوصلت فاضيه و هادئه العياده جدا موظفة الاستقبال هادئه , دفعت الفلوس و أعطتني ورقه أوقعها رحت الانتظار جلست الا نادت اسمي على طول .

 دخلت غرفه بيضاء جدا صغيره الصراحه بس مايفرق معي تحسي بامان أكثر بالعكس هههه  فيها سرير و جهاز الليزر و ممرضه فلبينيه , كل الي الممرضات فلبينيات و دا شي ايجابي .

 الممرضه مبتسمه تريحك مو مستعجله و معصبه لأنه أنا كنت مرعوبه طبعا أنه أحد حيكشف جسمك و أنا ما أحب فا لازم تشيلي جزء من كرامتك و انت داخله ههههه يمكن أنا مكبره الموضوع بس أكيد في بنات مثلي صح ؟

 خلتني أفصخ ملابسي ماعدا ملابسي الداخليه قلتلها راح أخليها قالت طيب و خرجت و تتعطيك شرشف تتغطي فيه طبعا انا انصدمت قلتلها هذا بس  , تسألك أول مره سويتي و أيش نوع الجهاز , بعدها تبدأ تاخذ قلم التخطيط الفسفوري حق المدارس و تقسم جسمك يعني يدي خلتها ثلاثه أقسام و هكذا , حتى تحدد المنطقه الي تمشي عليها و لمن تخلص تعديها و أعطتني نظاره بلاستيك للحماية العين .

 بعدها بدأت من الساق جابت موس جديد شالت عنه الورقه قدامي و بدأت تشيل و تسوي بالليزر عشان تتأكد مافي ولا شعره , الجهاز معاه هوا بارد و الغرفه صغيره و مكيف فا يا سلام كان كل شي ممتاز عشان يخفف الحراره , بعدها تبدأ تطلع للفخذ كامل , بعدها اليد مع الابط بعدها تقلبي على بطنك و تسوي رجلك من الخلف مع الظهر و بعدها الوجه كامل بعد حدود الشعر و الشنب و الذقن ماعدا الحواجب طبعا و حتى بين الحواجب لأنه حواجبي شبه لاصقين ببعض بس سبتهم طبعا ( الوجه حطت شاش لعيوني و فوقها نظاره صغيره لقد العين فقط و فوق هذا أنا مغمضه عيني من كثر الخوف , أخر شي منطقة البطن و البيكيني راحت جابت ثلج و منشفه و تحطها في المنطقه بعدها تسوي بالليزر و تعيد على كل المناطق الصراحه ماحسيتها سوت بأمانه يعني في دقيقه خلصت بعكس المناطق الثانيه كانت تمشي بشويش .

بالاخير دهنت جسمي كله بكريم و الصراحه ماقلتلي حطي كريم لمن ترجعي البيت و لا شي مع انه قبل كده سويت بعياده ثانيه وجهي و ادتني كريمين أحطهم 3 مرات باليوم فا معرف , قالتلي جلسة الرتوش بعد 10 أيام و فقط أحلق منطقة البيكيني و لكن جسمي أخليه .

نجي للسؤال المهم هل أتألمتي و كيف شعورك بعده ؟

الألم متفاوت بحسب المكان , طبعا أول جلسه تكون الحراره منخفضه مع الأيام يزودوها , ساقي تألمت في المنطقه الأماميه في النص و حوالين الركبه , يدي بدايه اليد و حوالين الكوع و أصابع يدي مره حسيت بحراره , ظهري و بطني و لا شي , منطقة البكيني شويه توجع أكثر تحسي اللسعه مركزه , و شنبي جدا جدا عورني بس ممكن يكون لانها ماشالت بالموس ثاني للتأكيد و تسد خشمك عشان الليزر مايجي عليه و ما أقلكم تسده من غير ماتقولي فا حسيت روحي بتطلع ههه , طبعا بشكل عام تشمي ريحة شعر منحرق زي لمن يطيح على الجمر أو يدخل في السشوار فا لا تخافي دا طبيعي .

شعوري بعده راحه نفسيه و أحس أني خفيفه , جسمي كان كله حبوب حمرء و بعض الجروح في اليد بس مو شي كبير راح ثاني يوم , الشعر في اليوم الثاني كأنه شايله بالموس يغزز و طلع بس جسمي ناعم الصراحه , كثير قالولي مايبان من أول جلسه 3 -4 جلسات يتحدد , اضافه جديده بعد ثالث يوم حبوب وجهي ماراحت بس أنا وجهي دايما يتحسس من شمع و حلاوه و موس فا عادي و الشعر ماطلع في جسمي بس في الاماكن الي شعرها غزير مثل منطقه الأبط .

اسم الجهاز ؟

دومينو - Domino

----------------------------------------------------------------------

* رتوش الجلسه الأولى *

حجزت أول ماخلصت من جلستي الأولى قالتلي عندك من 10 - 14 يوم تختاري متى تبغي الرتوش أخترت بعد 10 أيام  أتصلت علي قبلها بيوم تأكد الموعد و بعدها يرسلوا رساله بالوقت , و دا شي جدا مريح و جميل الصراحه تحسي أنه في احد وراك يستناكي مو تنسي أو يضيع عليك أنا جدا أدقق في هذه الأمور و أحب أحس أنه عندي سكرتيره كده هههه .

بعد العشره أيام الصراحه الشعر ما طول كأنه له يومين مشيول يعني منبت الشعر بس و أنا دايما لازم كل 3 أ-4 يام أشيل  فا حسيت انجاز عظيم .

جلست الرتوش طلبت مني أني ما أشيل شعر جسمي غير منطقة البكيني و للاسف جاتني ...... فا سويت كل جسمي ما عدا البكيني سألتها اذا ممكن أسويها بعدين لأنه مو بيدي يعني قالت لأ ( حقدت عليها طبعا هههه ) و بس جلست الممرضه تشيل بالموس و الليزر كأنه جلسه عاديه بس بشكل أسرع يعني تركز على المناطق الي فيها شعر أغزر , بس الي يعصبني فيها أنها ما تشيل شعر وجهي و على طول تسوي بالليزر فا شويه يوجعني أول أنا كنت شايله و قلت يمكن خفيف خليني أشوف الرتوش و برضه نفس الشيء فا عصبتني مره , الالم دي المره كان شنب و ذقن , أصابع يدي , حوالين الركب , أسفل الساق يعني الكاحل و الساق من قدام في النص لأنه شعري غزير هناك .
نهاية الرتوش ماراح الشعر تماما مانبت الشعر في بس خفت يعني بس عندي فرح بنهاية الاسبوع فا أكيد حشيل بالموس اعيد عليه .

هذه التجربه مع الممرضه اسمها أنجيليكا , غيرتها للجلسه الجايه أن شاء الله بعد شهر عشان أجرب كم وحده و أختار أفضل وحده عشان أعطيكم فكره أشمل .

----------------------------------------------------------------------

* جلسة الليزر الثانية *

بعد شهر من جلسة الرتوش حددت موعد للجلسه الكامله و بعد شهر أتصلت و أكدت الجلسه و أرسلتلي رساله بالموعد , هذه المره رحت عند وحده اسمها سارة , طلع أنه كل ممرضه عندها جهاز غير حسيت الحركه مو حلوه و يوم اسالهم طيب أيش أحسن واحد كلهم كويسيين و من هذا الكلام فا ينرفز الصراحه , المهم أنا غيرت من أنجيلكا لأنها مارضيت تشيل لي الشعر الصغير أنا عندي شعر صغير كثير في أعلى الفخذ و الساعد و يعني لو أبغى البس عريان لازم اشيل و أنا ابغى أشيل ليزر حتى ما أشيل هم يوم العزومه اشيل قبلها و الاشياء الممله هذه , المهم جاتني ساره هذه و فجأه بعد ما جلست على السرير و تجهزت تصدمني تقولي هذا الجهاز مافيه هوا بارد طبعا أنا الدنيا صارت سوداء و كأنها راح تقتلني بلمت فيها شوي -_- و بعدها قلتلها يعني يوجع ؟ قالت لا و انا قلبي في يدي من الخوف , و بعدها أعطتني كريم بنج ( طبعا أنجلا ما عطتني بنج)  , و قالت بس حطي في منطقة البكيني , بعدها قسمت جسمي بالقلم , شالت بموس جديد و بعدها حطت معقم أو شي سائل شفاف و تنظف فيه المنطقه ( هذيك ما سوت كدة ) و بعدها تشيل بالليزر الحمدلله ابدا ابدا ما تألمت , شالتلي بامانه أعلى الفخذ , يدي كلها من الكتف للاصابع , ظهري الي قبل كانت تشيل بس بالنص هذه أخذت ظهري بالعرض و نزلت لحد تحت و كله تاخذه بالعرض , الصراحه جدا جدا أحسن من الي قبلها و كمان حطت بودرة في الاماكن الحساسه , بس عيبها البرود و عدم التنظيم يعني تشيل منطقه من يدي بعدين تروح ليدي الثانيه بعدين تنزل لرجلي و ترجع ثاني ليدي فا حسيت كل همي أحفظ المناطق الي ما مشت عليها بعد كده صارت تحط علامة X على المنطقه الي خلصتها حتى هي لخبطت ههههه , و عيب ثاني أنها ما تغطيك كويس يعني دام بتشغلي في رجلي مو لازم تفتحي الشرشف لفوق فا حسيت أني طول الوقت متوتره بس أمانتها ممكن تتغاضي عن دا الشي و انت تضبطي الشرشف و تغطي نفسك بنفسك , و الصراحه الفلبينيات بشكل عام ماتحسيهم يطالعوا فيك همها تخلص شغلها بشكل تام و بس عشان كده ارتاح معهم , شي واحد سببه لي الجهاز انه لمن شالت يدي و ظهري من فوق حسيت بحكه و بعدها صارت حمرا يدي و طلعت حبوب زي الي تطلع من الحلاوه أو الة ازالة الشعر بس بنهاية الجلسه كل شي راح و الان مافي شي كمان , بس حطت لي كريم في وجهي , و قالت رطبي جسمك جدا ناشف ههههه .

هذه المره حسيت جسمي أنعم الشعر الصغير كان عندي شعر تحت الجلد  أغلبه راح الحمدلله و يارب مايرجع غزير , بس نصيحه للمقبلات على الزواج لا تسوي ليزر اذا زواجك قريب أقلها قبله بأربع شهور ممكن لأنه يبين في مسامات الشعر ماتروح الشعره كامله من الجلسات الاولى فا جهزوا نفسكم من بدري بالذات أنهم يقولوا لاتشيلوا شعركم حتى يشوفوا كثافة الشعر و هل جابت نتيجه ولا لا .

بس انا الصراحه شلت مرتين فقط بالموس خلال الشهر كله ممكن أجلس فيه لو عزومه صغيره لكن كان عندي أفراح فا أضطريت أشيل و حسيتها عصبت لمن قلتلها شلت لانها ماصارت عارفة كثافة الشعر , بس من الجلسه الاولى الي طلع عادي المناطق الحساسه الاندر ارم و البكيني طلعوا عادي و البكيني أكثر .

الجهاز اسمه جينتل ليز و هذا أكثر اسم مشهور و دايما اسمعه بين البنات , مافيه هوا بس فيه شي بارد هو مويه هو ايش شي يطلع مع لسعة الليزر بارد .

----------------------------------------------------------------------

* رتوش الجلسه الثانيه *

الرتوش هالمره مع وحده جديده لاني تأخرت على موعدي و أضطريت أخذ أي أحد , اسمها هاثرين اعتقد جفصه بكل معتى الكلمه , ماحبيتها ماتمشي على كل مكان كل شي تقولي هذا يتسوى في الجلسه الكامله مو الرتوش , بس تبغاك تصدقي كلامها , تسال اسأله شخصيه كثير و أعتقد الوضع الي احنا في مو وضع تعارف ابغى اخلص و البس و هي تتحكى , المهم جهاز الليزر جدا جدا بارد عندهم طلبتها تعلي الحراره مارضيت بس علتها عند البكيني , قوة أقل يعني جلسات أكثر و دفع فلوس أكثر فا حسيت أستغلال , غير أنه طلع المفروض أسوي ليزر امن يطلع الشعر مو كل شهر زي ما هم بيسوا , رحت لعياده ثانيه و الاخصائيه قالتلي كدة فا الجلسه الثانيه حتكون في عيادة ثانيه أدري لخبطت دماغكم بس أهو عشان تستفيدوا و تتعلموا من بدري ايش الكويس و ايش لا , و بالمناسبه لو تبغوا أي شي اتكلموا مع الفلبينيه الي معاكم او الاستقبال الي فوق لانه البنت حق الاستقبال الي تحت يارب تكون تقرأ أحب أقلك اهتمي و اتعلمي شغلك و فكري بمنطق , يعني أتاخرت على موعدي و الي بعدي اتأخرت قلتلها طيب أدخل قالت لا جات بتدفع الحساب بس ساعه الا ربع و هي ماجات أتوقع لو نازله بدرج كان وصلت لكن حسبي الله عليها أكره العرب تكذب علي في وجهي يعني يمكن صحبتها ولا صحبة أحد تعرفه فا عادي تتأخر , متنرفزه منها لانها بليده حتى ماما بس تسوي وجهها مارضيت تدخلها و دخلت وحده قبلها جسم كامل , بالعقل ماما دقيقتين فقط و الجسم ساعه ونص مين يحق له يدخل اول , الفلبينيه لمن خرجت قالت لماما ليش ماقلتليلي انا هذه غبيه الي في الاستقبال ماتفهم شي , و نطق شاهد من أهله , أعتذر على الكلمه بس دمي محروق .

----------------------------------------------------------------------

* جلسة الليزر الثالثه *

طولت عليكم في هذه الجلسه لانه أنا أتبهدلت مع المركز الجديد شفت عرض بموقع و عبالي انه أرخص قلت يلا أخذ العرض و أتورطت لا أرخص ولا شي شايلين نص الخدمات مثل الظهر و البطن فا لا تاخذوا عروض الا لمن يكون جسم كامل و شامل الوجه , المهم المركز كان اسمه كوزماتيكا أظن و كان بالتحليه و نظيف و كل شيء , بس قالتلي الاخصائيه أنه شعرك قليل لمن يطلع و انتظرت و لمن طلع أدق عليهم تقولي المركز انحرق و ممكن تغيري الليزر بجلسات عنايه قلتلها ماابغى طبعا , قالت اذا أنتظري أسبوعين كمان لمن نفتح المركز , و بعدها رجعت أتصلت و أحجز عندهم صارت مشاكل كثير من ناحية التطنيش و عدم تسجيل مواعيد , غير الطامه الكبرى أنه انت تشيلي بنفسك ماعندهم موس , غيروا المركز و صار مستوصف ورا ايس لاند محل جدا كئيب و غير نظيف تحسي الغرفه حق الليزر بالبدروم تحت الارض تحسي فيلم مرعب هههه و تجلسي ربع ساعه عند الريسبشن مافي أحد اصلا , جلست مماطلات معاهم أكثر من شهرين و جدا ضاق صدري بس مشكلتي دافعه الفلوس و ماقدرت أرجعها , المركز بعد ماتغير صار أسمه مركز العنايه بالبشره و الشعر , جبت موس معايا و أعطيتها هو بس أنا أصلا شايله بس عادت عليه , ماحبيت أنه كانوا أثنين فوق راسي وحده متدربه منهم و يدها جدا بطيئه و ثقيله , يحطوا لك زي كريم يبرد محل ماراح يضرب الليزر , و جاءت لحظة الحسم الم الم الم الم خيااااالي خلاص عيني دمووووع مني قادره و حاطه يدي على فمي من كثر الالم حقيقي كانه لستك مطاط و أحد يضربك يضربك و مايوقف الالم ابداااا , اااه كانت تجربه سيئه جدا من ناحية عدم التنظيم و الالم و النظافه و كل شيء , و اصلا من الالم ماسويت وجهي خفت يحرقوا لأنه جسمي صار فيه بقع حمرا جلست أسبوع يمكن و خفت مره على نفسي , فا ان شاء الله راح أرجع لاسامه الوسيه الجلسه الجايه مافي مقارنه ابدا بين الاثنين , و نصيحه أخيره أصحكم تاخذوا عرض 6 جلسات و انتوا ماجربتوا الجهاز خذي أول جلسه تجربه و قوليلهم لو عجبني راح أخذ العرض , و لو شفتي عرض أتاكدي ايش المناطق الداخله يعني أنا قرأت حدود بكيني عبالي عادي طلع لا بس حدود و الاخصائيه كانت تبغاني أشتري بكج 6 جلسات أيش أبغى فيه يعني فلوسي راحت هباءا منثورا الجهاز جدا قوي عندي ما اتالم و اخذ جلسات أطول ولا اشوف الموت كل مره ههههه و بس بالنهايه هذه تجربتي الخاصه ماأقصد اساءه لاحد و لكن بنقل الي حصل تماما .
بالنسبه للشعر/ الجلسه الثالثه لاحظت الشعر خف كثييير و صار يطلع بأماكن متفرقه فقط و المسامات خفت و الشعر قل لي شهر و أكثر الان نمو الشعر جدا بطيء الحمدلله , توقف الشعر اتوقع عند الجلسه السادسه بيكون , الاماكن الحساسه بالاسفل مازال الشعر مثل ماهو للاسف .

* جلسة الليزر الرابعه * 

و رجعنا لاسامه الوسيه , و مااكذب عليكم يا بنات ندمنت اني تكلمت عن تجربتي قبل ما أخلص تخيلوا ماصرت الاقي حجز العياده زحمه صارت هههههه بس يلا يهون الانتظار لعيونكم , الجلسه هذه عملتها مع جيهان سويت بجهاز جينتل ليزر , كانت الحراره عاليه شويه حسيت بالم مع انه حطيت بنج فقط عند البكيني , و جسمي كله طلع فيه حبوب حمراء و بقع بس مو حرق نهاية اليوم تروح بس يكون في حكه  , الان بدأت الاحظ تغيرات جامده صار الشعر يطلع مفرق و ياخذ شهر عبال يطلع , عدت 10 ايام عبال الرتوش الصراحه البكيني طلع من ثاني يوم و زعلت بس بدأ يطيح من حاله بعد اسبوع , لكن اندر ارم و رجلي و يدي كان فيهم بس كم شعره , بعد جلستة الرتوش الصراحه قالتلي الي سوتلي انه البكيني ماكانوا بيشيلوا مضبوط مو باين أنه جلسه رابعه فا شكله يحتاج جلسات أكثر من جسمي هم بعضهم غشاشين فا دايما ركزوا أنهم يمشوا على المنطقه كامله مو بس من فوق و اي كلام فا هي مشيت مضبوط هذه المره , و جسمي صح فيه بقع حمرا او زي جروح صغيره في المسام معرف ليش أظن أنها مو نظيفه و ماتعقم الادوات بس جسمي صار ناعم و مره مبسوطه بالنتائج لحد الان و ماراح أرجع لها جيهان , أدري طفشتكم من كثر ما أغير بس ايش اعمل الي كنت مرتاحه لها ماصارت تسوي ليزر غيروا قسمها كان اسمها سارة .

حجاوب على بعض الاسئله الي البنات سالوني هي :

- هل الليزر يطلع ريحة بالجسم ؟
جسمي لا , منطقة البكيني صارت أنظف و ابدا مافيها ريحه الحمدلله , الاندر ارمز الصراحه لاحظت شوي مو انه ريحتك توصل لاخر الشارع بس يعني بدل ماكنتي تستحمي بعد 5 أيام يصير بعد يومين أو 3 او حتى كل يوم للاسف , تحتاجي تعيدي تحطي مزيل رائحه ثاني مره خلال اليوم , طبعا ماعندي علم اذا كان دا حيستمر لبعد الجلسات أو بس خلال الجلسات لانه بنسخدم الموس و عملية حرق بصيلات الشعر هي الي بتسبب الرائحه العلم عند الله بس مع النظافه كله تمام لا تجي وحده تقول أنا نظيفه بس الليزر السبب ههههه  .

- هل ينفع أسوي حمام مغربي مع الليزر ؟
لا, و الف لا جلدك حساس و طبقات منه بتروح تجي تفركي بقوه راح ينشال جلدك كله لاحقه عليه ما يحتاج , بس أستخدمي الليفه العاديه خلال الاستحمام اول 3 شهور لين يتعود جسمك انا جسمي حساس فا كنت خايفه بعدها عادي سوي لكن لازم تنتبهي انك ترتاحي اسبوع بعد الجلسه .

- أيش استخدم كريمات مع الليزر ؟
بعد الليزر خلال 4 ايام ماتقربي ولا شي معطر منك كريم معطر لا قبل الليزر ولا بعده ولا تستخدمي مقشر للوجه او غسول بس خلال اربع ايام بعد الجلسه , و لا تستخدمي كريمات او اي شي قبل الجلسه غسلي بالماء عشان تتاكدي مافي شي او كريم على جلدك , و بالنبسه للكريمات حق الليزر اسالوا الصيدلي و العياده حقكم .

- ليش يختلف قوة الليزر من عيادة لعيادة و ايش أفضل جهاز لليزر ؟
صح لمن مايكون في الم و الحراره واطيه بياخذ جلسات اكثر بس انا بسوي جسمي كامل و مستحيل اتحمل الالم حق الليزر القوي , فا انت اختاري اذا تبغي تخلصي بسرعه روحي عيادة ليزرها قوي أذا تقدري تستحملي لانه 4 -5 جلسات اتوقع تكوني مخلصه ( أتوقع من راسي بالنسبه للنتايج الي شفتها ) و بالنسبه للرتوش غالبا الليزر القوي مايكون معاه رتوش و الخفيف يكون معاه , فا هو يعتمد على اسحمالك مافي غشش ولا شي .

- هل لازم اعمل الليزر كل شهر ؟
ايوا افضل لانه الانتظام راح يخلي البصيلات تنحرق بسرعه , أما تسوي شهر وتسيبي عشره ماراح تلاقي النتيجه الي تبغيها .

- شعري خفيف اسوي ليزر ؟
لا طبعا لانه راح يزيد للاسف , أعملي الاماكن الي فيها الشعر سميك و بس لا تخسري نفسك جسم كامل .

* جلسة الليزر الخامسه *

أول شيء بقوله انه للاسف البقع الي من الجلسه الي فاتت ماراحت من جسمي لليوم و قلتلهم بس ماسوا شي فا ماانصحكم تروحوا لجيهان ابدا , و ندخل في موضوعنا الي هو أنه الشعر قل و صار في أماكن كثير مافيها شعر مدة طلوع الشعر صار أقل يعني شهرين جلست أكثر منطقة طلع فيها الاندر ارم و اليد , فا جلسة اليوم كانت عند حسنا و شكلها هي الي راح اكمل معها هادئه تمشي على كل الجسم و كل المناطق , للامانه صار الليرز الان يعورني كثير و بيصير حار ماعندي فكرة ليش بس أنا بقول يمكن بعد كل جلسه يعلوا الحراره أكثر المهم اني بلعت الالم و استحملت عشان يخلص و ارتاح للابد , أكثر اماكن المتني اليد و الساق محل مافي الشعر غزير , و الشنب ,  ورمت يدي بعد الجلسه و وجهي بس أول ما رجعت البيت خف كل شيء الحمدلله , أستخدمت جهاز جينتل ليزر و رسوم الجلسه صار 1200 حاليا الحمدلله , لو تحدد موعدك و كانت عليك الدوره الشهريه سوي جسمك و اطلبي منهم بعد كم يوم تجي تسوي البكيني يكتبوا لك بالفاتوره , و مازلت أنصح اي وحده لسه بتفكر لا تفكري روحي و استحملي الالم لانه شدة و تزول هههه , و ان شاء الله اثار الحروق تروح بعد كده لو سويتي حمامات مغربيه و تقشير بالمستقبل  , رحت الرتوش عند وحده اسمها رسميه و قالتلي عندك شعر تحت الجلد كثير محبوس بعد اسبوع من الرتوش روحي سوي حمام مغربي حتى يتجدد الجلد قلتلها متاكده مااروح اتعور وانا بسوي ليزر قالت لا عادي بعد اسبوع عشان يتجدد الجلد و يخرج الشعر القديم و طبقه الجلد الميت و فعلا رحت و سويت و مرره فرق راح الشعر المحبوس تحت الجلد الي يكون مره خفيف و مايقدر يطلع وعلى حظي دحين منعوا الحمامات المغربيه في جده .

* جلسة الليزر السادسه *

الجلسه السادسه شعري خفيف صار و كثير مناطق ماعاد فيها شعر الحمدلله بس انا بكمل لانه بعض المناطق فيها بالذات البكيني مره يطفش بس ممكن بعدها اكمل بس بكيني بس راح اسوي جلسه سابعه حتى اتاكد و الثامنه اتوقع بتكون بس بكيني يعني مو كل المنطقه بيطلع فيها بس جزء معين بيطلع فيه الشعر عادي ولا كانه في ليزر فا غيرت عند رسميه صرت اسوي و حسيتها تمشي على البكيني بأمانه اكثر من الباقيين انصحكم تروحوا عندها , هي كلامها كثير و فلسفتها كثير بس قفلوا اذنكم , الالم مع الدوره الصراحه يكون مضاعف و انا دايما اتورط اروح في وقتها فا رتبوا وقتكم انها ماتجيكم فيه , وبس مره مرتاحه المسام قل بس مااختفى بس احسن من اول بكثير , و الرتوش برضو كانت مع رسميه شيكوا علىهم دايما بيرجعوا عرض 1200 للجسم كامل .