ريفيو : بنانا بوت وطريقة التشميس و الحصول على لوك برونزي / Banana Boat Deep Tanning Oil

السلام عليكم و رحمة الله و بركاته

تكمله لريفيوهات الصيف حيكون عن ماهو محور الصيف و هو التشميس , نزلت في انستقرام صورة يدي و كثير عجبهم لوني و أنا أولهم طبعا ههههه لاني ماقد التزمت بالتشميس و خليته يثبت في جسمي لانه الثبات أهم شي .

دائما في صور الأجانب أشوف زيت التشميس البنانا بوت و كثير يمدحوا , و عندنا كان مو متوفر و لو توفر بيكون جدا غالي 100 ريال و فوق , و أنا مسافره دبي لقيته بسوبر ماركت ويترز بدبي مول الدور الارضي , و كمان كان عليه تخفيض سعره ب 28 درهم و أنواع أغلى بس كلهم أقل من 50 درهم , في بنات بيقولوا شافوا في صيدلية وايتس بس لسه ماعتبتها أكيد لو رحت باذن الله اتذكر و اكتب لكم هنا و عن سعره .

 الأنواع تختلف بحسب أنه فيها حمايه من الشمس ولا لأ , و نسبة الحمايه , طبعا كل ماكانت بشرتك حساسه و تنحرقي بسرعه خذي نسبه حمايه أعلى , و هل هو ضد المويه أو لا , أنا عني أفضل اللون الأحمر الي مافيه حمايه حسيت اللون يمسك معاه أكثر بس لمن خلص أستخدمت الثاني .

المنتج مكوناته زبدة حبوب الكاكاو , موز و جزر و خلاصتهم , و جوز الهند , يعني بالنسبه ليا ريحته جميله , سعته 8oz .

مميزاته على شكل بخاخ فا حلو جدا و مريح و تقدري تتحكمي فيه بسهوله , مع موية البحر يعطي لون محمر جميل , يبين تغير اللون في أيام قليله , حجمه مناسب و جدا كويس لسعره , بالنسبه ليا أحسن و أرخص و ركزوا على أرخص زيت تشميس أستخدمته و ما أشوف فيه عيوب اطلاقا .

و الان حجاوب على أسئله طلبت منكم تسألوها عنه و أيش يهمكم تشوفوا في الريفيو أحسن من أني أتكلم كثير .

• كم يقعد لين يروح ؟

 أنا أشوفه يعتمد على الجسم جاف او لا , فيه جلد ميت كثير فا أنا جسمي بعض الاماكن تجلس أكثر من شهر و أماكن تخف بعد أسبوعين .

• كم ساعه تتشمسي ؟

 بالبدايه ساعتين قدام و ساعه ظهري لمدة ثلاثة أيام ورا بعض , عشان ماابغى أنحرق و أثبت اللون مع التكرار فا يزيد بشكل معتدل , بعد كده صرت في الاسبوع مره أجلس 3 ساعات مرات ساعه على حسب عشان يتثبت اللون و مايروح و يفضل متشمس بس ماابغى أصير سوداء لكن لو تفضلي تكوني اغمق مني و عندك قدره تستحملي الشمس أجلسي .

• هل أستخدمتي معاه شيء ؟

لا فقط موية بحر , و استحمى أو أخد دش سريع يعني أشيل الزيت و بعدها أسبح لو كنت في مسبح مويته كلور , لانها راح تشيل الاحمر اللي في جسمي و تخلي أسود .

• طريقة الاستخدام ؟

 أنا الحمدلله ما أخرج كثير و اتعرض للشمس و الجفاف و اقشر جسمي لمن أستحمى فا مااشيل هم قبل مااتشمس اني اعمل خطوات معينه , لكن لو كنت من النوع الي مايقشر و بشرته جافه جدا و تتعرضي للشمس في الجامعه و المدرسه , انصحك قبل طلعة البحر و التشميس تقشري جسمك و ترطبي عدل قبلها بيوم , بعدها أحط جنبي قارورة ماي صحه أعبيها من البحر و اصب على جسمي و بعدها أحط زيت التشميس كل نص ساعه او 45 دقيقه اعيد نفس الحركه حتى يكون جسمك في مويه و مترطب ماينحرق و البحر يعطيك اللون الاحمر و الزيت للتجديد لمن ينشف .

• ايش الخلطات الي ممكن تنحط ؟ 

مااستخدم ولا خلطه معاه .

• هل اللون دائم ؟ 

أكيد لا مع الوقت راح يروح بس انه مو من غسله حيروح طبعا .

• هذا السؤال ضحكني تقول لو وصلت للون حلو وبعدت عن الشمس هل بيظل اللون يتغير يزيد قصدها ؟

 طبعا ماراح يزيد لانه ماهو سيلف تان من يوم تستحمي خلاص حتى لو اتعرضتي للشمس و اتمشيتي على البحر بعد ماتلبسي ماراح يتأثر لونك .

• هل يخلي الجسم يقشر ؟ 

لا , و كل الي معايا محد قشر , بس برضو يعتمد على نوعيه جلدك أكيد .

في الأخير معلومة جدا جدا مهمه تخليها في بالك انك لمن تتشمسي و وقت تبغي التان يجلس لمن تستحمي لا تستخدمي ليفه ابدا حطي الشاور جيل بيدك و نظفي جسمك , لانه الليفه خشنه و حتشيل اللون أسرع .

و هذا لوني بعد التشميس بأستخدام البنانا بوت 

التقييم /

A