ريفيو كحل مايبلين كاجال / Review maybelline the colossal kajal

السلام عليكم و رحمة الله و بركاته

اليوم الريفيو على كحل كثير أتجننوا عليه بسبب اعلانه و كمية السواد و سهولة الرسم به زي ما نشوف لكن هل كل كلام الاعلانات صح ولا لا ماراح نعرف الا لمن نجرب يا نتورط يا نكون لقينا عشق جديد .

جلست أدور عليه فتره طويله كان مخلص من كل مكان , اسمه  The colossal kajal , درجته Black / Noir , سعره يفرق على حسب المكان بين 25- 30 ريال / سعودي .

 مميزاته أول شي لاحظته أنه أول ما أحطه عادي مايطبع على جفني و بعدها طول اليوم برضو ماطبع سواء كنت حاطه برايمر أو لا ( بس أفضل تستخدموا برايمر دايما ) مفيد أنه مايحتاج برايه معاه , حطيت سواتش في يدي بعدها بكم دقيقه حاولت أمسحه ما رضي يتمسح الا لمن جلست أعمل بقوه , يعني حلو لو جات يدك بالغلط على طرف عينك ماراح ينسحب و يصير خط اسود في وجهك , طبعا عندنا يبيعوا من غير ورق لكن من الاعلانات يقولوا يدوم من 6 الى 12 ساعه ممكن 6 ساعات بس يبدأ يبهت اللون , الشكل الخارجي حلو و اللون الاصفر مميز و عجبني ^^ ,  أنا عني ممكن أستخدمه في خرجه سريعه أو نهاريه بس , أزالته سهله بمزيل المكياج .

عيوبه طبعا السواد الفاحم كذب لونه عادي , لازم أعيد كم مره عليه عشان يصير أغمق مو من أول مره زي الاعلان , يتكسر بسرعه لو كانت يدك ثقيله عليه , حطيته داخل عيوني و فجأه أختفاه و راح مايطول داخل العين , طبعا لانه ما يتبرا فا ما تقدري تعملي خط نحيف و Cat eye بعد أول أستخدام , كمية المنتج دايما في دا النوع من الاكحال تكون قليله , مو متوفر منه الا اللون الاسود , في النهايه يشبه كل الاكحال الي تتبرم الي جربتها ممكن أغمق بدرجة و ثبات أكثر , لكن مو الي يخليني ما أستغنى عنه أو أرجع أشتريه .

التقييم /
C .

سواتش

الخط الاول خط واحد و ثقلت يدي و أنكسر جزء من القلم , الخط الثاني  خط واحد  , الثالث عدت عليه كم مره حتى صار أسود غامق  و سلامتكم ...