السلام عليكم و رحمة الله و بركاته
كريولاين يا كريولان نسمع عنها كثير كل خبيرات التجميل يستخدموها , لي تجارب سابقه معاها و كانت جيده نوعا ما فا قلت خلني أشتري أكثر أشياء تلفت نظري و ابغى أجربها من فترة , طبعا كريولاين في منها تقليد فا أنتبهوا , أنا رحت مجمع الشرق بجده محل اسمه روج هو فيه كل منتجات كريولان , فا لا تاخذوها من أي مكان حتى لو قالوا لكم الاصلي و لهم حساب في انستقرام تقدروا تشوفوا الفروع .
و لله الحمد ما كثرت أغراض أول شي و أهم شي عجلة الكونتور أشهر من نار على علم , أنا الاضاءه ماعندي مشكله معاها بس كنت أحتاج كونتور قوي , متوفر فيها أساس يتغير لونه بحسب البشره , كونتور و اضاءه ثابته الوانهم في كل العجلات , هو مكتوب عليه أنه أساس بس محد يستخدمه لكذا , أدري شكله مقزز بس هذا من الرطوبه و يروح من اول استخدام , سعره 185 ريال / سعودي .
للحواجب شدو بني أكوا ( مائي ) كان في درجات كثير أخترت لون بني غامق و بارد عشان شعري لونه أسود , باين في الطبيعه و الصوره اللون بارد بس لمن أحط المويه و حطيته في حواجبي دافيء لونه يعني محمر شوي و زعلني هذا الشي و سعره 60 ريال , طبعا انا كنت أبغى التعبئه الصغيره بـ 30 ريال لكن كالعاده الموظفات و لا كأنك تتكلمي و حطت لي الاغلى طبعا , كميته كبيره و لونه مو نفس الي ببالي يعني مدري متى حيخلص .
و بس هذا البوست البسيط أتمنى عجبكم و كان خفيف عليكم , و في روابط تحت لبعض مواضيع متعلقه بكريولان .
No comments:
Post a Comment
لأي استفسار أتفضلوا...®