بسم الله الرحمن الرحيم
اليوم بتكلم عن شي جدا مشهور و مهم لمحبات المكياج و العنايه ، و اللغط عليه كثير هل نحتاجه هل يستاهل سعره ، الكثير و الكثير من التساؤولات و الكثير و الكثير من البدائل الي يحاول البعض ادخالها انها تؤدي نفس الوظيفه و بسعر اقل ، طبعا طبعا انا اسمع و اقرا و اشوف و لكن لازم بالنهايه اجرب بنفسي و اشوف .
اليوم بتكلم عن جهاز الكلارسونيك ميا ٣ ممكن يكون اغلى جهاز بالسوق من هذه الفئه ، وهو عباره عن جهاز مقشر عميق للبشره و المسام و التراكمات ينظف احسن بـ 6 مرات من استخدام يدك مع مقشر او غسول ، فيه ٣ سرعات مختلف ، سعره اخذته في البلاك فرايدي كان ب ٦٠٠ من نفس موقعهم و موجود بسيفورا امريكا و كمان في سيفورا الي عندنا بس غالي عندنا بالف ريال يوصل ، و كمان موقع نوردستورم يسوي تخفيضات حصريه دائما و تكون اشكالها حلوه و مميزه و لهخا الوان كثير تناسب الكل بنات و اولاد , تجي معاه فرشة للبشره العادية و غسول للبشرة الدهنيه و المختلطة .
مميزاته ، ينشحن بشاحن مو ببطاريه ، يجلس الشحن كثير لو مااستخدمتيها كل يوم ممكن تجلس شهر و اكثر الصراحه ( بس يختلف حسب السرعه المستخدمه و المده ) تنشحن باليو اس بي ، متوفر فرش لجميع المشاكل و البشرات المختلفه و تتغير كل ٣ اشهر ، فيها ٣ سرعات مختلفه و مؤقت يوضح لك كل منطقه كم ثانيه تجلسي فيها و متى تنتقلي للمنطقه الثانيه و المناطق هي ( الجبهه - الخدود - الانف و الذقن سوا ) و ماتتصورا قد ايش دي الميزه مهمه مهمه لمن استعملت اجهزه ثانيه جلست معرف افتح الجوال احسب ولا ايه احس اني تهت فا مره مريحه دي الخاصيه لازم تركزوا عليها ، الجهاز جدا جدا جميل تحسي بعده بنظافه مابعدها نظافه و تقشيره قوي فا يستخدم مره كل اسبوع او كل اسبوعين لو ماحطيت مكياج و غالبا في الليل بعد ما اشيل المكياج ، مافي شي شبهه ينظف ويقشر من قلب تحسي مع الكلارسونيك وجهك ابيض و نقي ، يشيل كل المكياج و ينظف المسام ، للامانه مافي اي جهاز ينظف بقوته و مااحس له بديل لانه في خاصيه جدا مميزه كمان ، انه فرشته ماتدور بس تهتز و دا الشي مايخلي سطح البشره يتخدش و يترهل ، ودي الميزه الي لحد الان مافي ولا ماركة قدرت تسويها فا لا يمكن نطلع بدائل لها دام الخاصيه المييزه دي مو موجوده ، انا ماندمت على شرائها و للامانه حقي للاسف متعطل الان طاحت طيحة جامده وبطلت تشحن و مره نفسي اشتري وحدة ثانيه , و خطوه مهمه عشان تحافظي على عمر و نظافة الفرشه غسليها بصابون معقم بعد كل استخدام حتى بقايا المكياج ماتجلس فيها , و كمان ابداي بالسرعه الواطية بعد ماتتعودي عليها علي السرعه , و ماانصحكم تشيلوا المكياج فيها ابدا شيلي بمزيل و بعدها بنظافه استخدميها مع الغسول , و كمان نصيحة جدا مهمه انا غلطت فيها و جرحتني لا تظغطي بيدك بقوه على وجهك خلي يدك اخر الجهاز حتى يكون اقل ضغط ممكن و خليها هي يادوب تلمس سطح وجهك .
العيوب ، اكيد غلاء السعر و انه كل شوي يطلعوا جهاز في مميزات اكثر ، تطلع حبوب اول استخدام ممكن تجلس شهر و بعدها تروح عادي بس تخوف الفتره الاولى فا انتبهي تستخدميها لاول مره لو عندك شي مهم لانها تاخذ وقت بس هو يطلع كل الدهون المتراكمه .
انصحكم ولا لا فيه ؟ لو كنت فوق ٢٥ سنه انصحك تستثمري فيه و تخلي معك للابد كجهاز مقشر منزلي لانه مافي شي قوي زيه ، ولو كنت تحبي العنايه اكيد لازم يكون في روتينك الصراحه مره مهم و ينظف , بس مو لازم تشتري اغلى جهاز ميا 2 ارخص و اصغر و مناسبه انا اشوفها ، لكن لو كنت صغيره ممكن تاخذي من الاجهزه العاديه المتوفره في الصيدليات لانها تكون ارخص و ان شاء الله بسوي لكم ريفيو عن واحد منهم ،
التقييم /
A
No comments:
Post a Comment
لأي استفسار أتفضلوا...®