بسم الله الرحمن الرحيم
السلام عليكم اليوم وقت ريفيو الجهاز الارخص لتنظيف البشرة و كمان معاه ملحق لازالة شعر الوجه , هو جهاز من ماركة براون , تقدروا تلاقوا في كل الصيدليات مثل النهدي و ممكن ساكو اكسترا اي محل يبيع اجهزة براون , و صلني من فترة و كان معاه مجموعة من الفرشة حاولت استخدمه لفترة كافية عشان اعطيكم رايي الكامل عنه , سعره 375 يزيد و ينقص بس في دي الحدود , تجي معاه فرشة للبشره العادية , و راس لازالة شعر الوجه الشنب , بين الحاجب و طرف الوجه .
مميزاته , الفكرة منه انك تعملي تقشير لوجهك قبل ازالة الشعر و هذا شيء معروف من زمان فا جمعوا في جهاز واحد عملي , يشتغل بالبطاريه العادية , صغير و خفيف و عملي , مناسب للاستخدام اليومي , جهازين في جهاز واحد , تجلس البطاريه لفوق 30 استخدام , يجي معاها غطاء و فرشه للتنظيف الجهاز و شنطة تحفظ كل الادوات .
نبدا بألة تنظيف الوجه , استخدمها كل يوم جدا خفيفه على البشره و تنظيفها و تقشيرها سطحي , حتى مع الفرشة المخصصه للتقشير العميق , حلوه تاخذيها بالسفر لانه كل يوم تحطي مكياج فا تحتاجي تنظيف يومي و مااحب الكلارسونيك كل يوم لانها قوية فا افضل استخدم البراون , ماتنشف وجهي او تطلع حبوب , ولا حسستني ابدا , متوفر لها عدة فرش لانواع البشره المختلفه , بتكلم عنهم بشكل مفصل .
الفرش
فرشة البشرة العادية /
تستخدم كل يوم و كويسه , و تنظف بشكل سطحي , ماتحسي معاها بنظافة 100% , بس ماتطلع حبوب جدا مناسبة للبنات المراهقات حتى ماتحسس بشرتهم , استخدمها يوميا لو حطيت مكياج خفيف , حلوه بس مو المفضله عندي .
فرشة التقشير /
تنظف بعمق اكثر من الي قبلها استخدمها مره بالاسبوع , بس بالسفر اخذتها لاني كنت احط كل يوم اساس فل كفر , فا مره كويسه كانت تنظف كل المكياج و الاساس و الحمدلله رجعت من السفره ولا طلعت لي ولا حبه , ولا هي خشنه مرة فا هي اكثر فرشة احبها و لا حسست لي بشرتي ابدا , فا اذا تحبي التقشير العميق او تحطي مكياج كثير انصحك فيها لانها حتنظف بشكل اكثر و اعمق .
فرشة البشرة الحساسه /
تجي في المرتبه الثانيه لاكثر فرشة حبيتها , جدا خفيفه و تجنن بس ماتنظف بعمق بس تخليك توزعي الغسول و تنظف السطح الخارجي بشكل بسيط استخدمها بشكل يومي لو ماحطيت مكياج و ارتحت عليها اكثر من الفرشه العادية , مناسبة للبنات الصغار الي بشرتهم تحسس من كل شي او فيها حبوب كثير و مايبغوا شي يكون قاسي على البشره , مره تجنن و لونها كمان يجنن .
الاسفنجه - أسفنجة المكياج /
لتوزيع الاساس و البرايمر , الصراحه توزع البرايمر كويس لو كان كريمي ما يحتااج يتوزع بالطبطه مثلا زي المختص بالمسام , بس لاساس صح وزعته بشكل متساوي بس خفت من التغطية و تشربت الاساس يعني تحتاجي كمية اكبر من المعتاد عند استخدام الفرشة العادي , و بيني و بينكم محا اخلي اله تتحرك في وجهي لتوزيع المكياج بما اني احط مكياج دايما فا محا اقدر انظف وجهي بالفرشه و بعدها احط اساس فيها احس وجهي بيتعب , و فوقها بتخسرني اساس اكثر ههههه , فا ماحسيتها شي عملي الصراحه و مو دايما اروح لها اوزع الاساس بالفرشة اسهل و اخف , ومن عيوبها المكياج يمسك فيها و تتغير لونها و ماتنظف من اول مره .
فرشة ازالة الشعر /
طبعا انا ماشلت فيها لانها تنتف و انا مسويه ليزر بس جربتها لقريباتي , تشيل الشعر من اول مره ماتحتاجي ترجعي كم مره , تشيل الشعر من اضيق الاماكن زي الشنب و بين الحاجب , جدا فعاله و عملية الصراحه لو تبغي تشيلي شعرك بسرعه , بس الالم موجود ههههه زيها زي اله ازالة شعر الجسم , تخلي في احمرار بسيط للبشره بس يروح بعد فترة بسيطه يعني لا تخافي .
العيوب , ماتنظف بعمق كبير مهما اختلفت الفرش , الفرشة تدور فا ممكن انه يخدش البشره بس الدوران خفيف مو دورة كامله و سريعه لا زي روحة و رجعه كدة بس انه تتحرك عكس الكلارسونيك فرشتها كانت ثابته بس تهتز , فا دا عيب ممكن ياثر على البشره في المدى البعيد .
بالنهاية اكيد السعر و العمر يحدد الجهاز الي تشتري هذا اشوفة جدا مناسب للمراهقات و الي لسه ماعندها ميزانية تستثمر في جهاز غالي , جربوا انا حبيته بشكل عام و استخدمه كثير الصراحه و مرتاحه عليه , الي جربته تكتب لي تجربتها في خانة التعليقات و اذا جربتوا اجهزه من ماركات ثانية اعطونا رايكم فيهم , ان شاء الله كانت التدوينة شامله و مفيدة و قدرتوا تقرروا اي جهاز مناسب لكم .
التقييم /
B
No comments:
Post a Comment
لأي استفسار أتفضلوا...®