مفضلات شهر ذو الحجه / October Favorite

السلام عليكم و رحمة الله و بركاته

ذا الشهر ركزت أني أشوف ايش عندي و أدور له أستخدامات ثانيه أفضل أو أني أجربه مع شي جديد و أشوف أيش النتيجه الي تطلع و النتايج لحد الان حلوه و حبيتها و شجعتني أني دائما أبحث في الموجود عندي .

العنايه

برايمر للوجه من سماش بوكس - Smashbox photo finish Hydrating  

أنا بشرتي مختلطه يعني عندي مناطق فيها جفاف فا دا يأثر طبعا على الاساس فا الي في سيفورا اختارت لي دا لانه مرطب فا استخدمه لوحده و ما احتاج كريم مرطب قبل المكياج بس , حلو و مره خفيف على البشره و أنصحكم تشوفوا برايمرات سماش بوكس لانه فيها أنواع تناسب كل بشره .

برايمر لتحت العين من سماش بوكس - Photo Finish Hydrating Under Eye Primer

أكبر مشكلة عندي أنا الكونسيلر و دايما في رحلة البحث لأفضل كونسيلر فا لمن شفت أنه في برايمر مخصص لتحت العين لازم كنت أخده فايدته بالنسبه ليا يساعد أنه يخلي سطح البشره ناعم و جاهز للكونسيلر يتمد بشكل أسهل فا ماأعتقد أني اتخلى عنه .

المكياج 

1- #19  Ysl Rouge-Volupte

2- Tom Ford Lipstick in Flamingo

3- NYX MegaShine lipgloss in Smokey Look

 كل واحد لوحده مو مرره حلو أو مره فاتح فا قلت خليني احطهم مع بعض , السواتش لكل واحد.

 السواتش لهم مع بعض 

يعطيك لون وردي فاتح و القلوس يخلي اللون أكثر دفأ فا يخلي مناسب لبشرتي مو كأني ميته , مناسب للنهار أو خرجات بسيطه و يتناسب مع أي لون لأنه اللون مو قوي على الشفايف أخف من سواتش اليد .

منوعات

Pumpkin jar

دي عندي من سنه من الهالوين الي فات ممكن تحطي فيها حلويات و كده أنا كنت حاطاها زينه  في غرفتي و ابغى استخدمها في شي أخر شي فكرت أحط فيها الهارديسك و الشواحن و سماعتي عشان يكون كل شي موجود في مكان واحد بشكل حلو D :

قبل يوم للتصوير رحت ردسي مول لقيت كشك يبيع نفس الشكل بس صغيره قلت لازم أخليهم عائله وحده ههههه كيوت مره و جوتها موجود لبان حامض بعد مايخلص بفكر أحط فيها الحلقان الصغيره .

شال جلد النمر 

جلد النمر موضه له فتره لكن هو يا يكون معاك يا يكون عليك فا أنا مره أكره لمن أشوفه بزياده لكن عاجبني في نفس الوقت فا لقيت دا عند ماما و حقيقي لبسته دي الشهرين مع ملابس كتيره هو خفيف و ناعم فا لانه في الخريف و الشتاء الملابس كلها عباره عن طبقات بس احنا جونا لازم نركز أنه مو داك البرد فا لانه خفيف قدرت البسه و عملت طبقات في لبسي من غير مايسبب لي حر أو حجم زياده كمان .

لبسته كا كاجوال مع بلوزه ساده و جينز فا اعطيت للبلوزه تغير بشي غير عن  السلاسل و لبسته كمان مع فستان و ممكن ينحط على الشنطه , مره صرت صحبه مع الشيلان الخفيفه 3>.

سكويت مالح بالجبنه Tuc

دا البسكوت لذيذ بشكل مو طبيعي ماما شافته في الاعلانات و جابته من بعدها أنا الي صرت أدور عليه , في بس 20 كالوري ممكن تاكلي كا وجبه خفيفه , أو تفطري فيه لبنات الجامعه أو يكون في شنطتك جربوا حقيقي طعمه لذذذذيذ .

مما قرأت .. أعجبني ..

" الحب مثل الموت وعد لا يرد ولا يزول "

                                                 

                                                     محمود درويش 

مفضلات الشهر السابق