السلام عليكم و رحمة الله و بركاته
طبعا أكيد عارفين كلمة درق ستور ( drugstore ) كلمة صارت متداوله في الأونه الاخيره و معناها محلات تبيع مكياج من ماركات جودتها جيده و بأسعار حلوه , طبعا أرخص مكان لدي الماركات هو أمريكا دايما عندهم عروض و تخفيضات و منتجات أكثر من المتوفره في العالم ,عندنا للاسف مافي منتجات الرفوف فاضيه البنات مابيفهموا عليك لو تشرحيلهم المنتج , و كمان المنتجات الجديده مررره تطول عبال توصلنا , فاحبيت أشتري من ماركات و منتجات كثير اسمع مدح عليهم و بعض الاشياء شفتها رخيصه قلت ليش لا الأسعار حتكون بالدولار طبعا لانه أغلب الاشياء اصلا مو متوفره في اسواقنا ولو كانت في حتكون باغلى فا ما يحتاج احول بالريال , فا خلونا نبدأ من غير أي ترتيب محدد .
مسكارات كفر قيرل غنيه عن التعريف دائما تكون حلوه , و هذه نزلت جديده عباره عن خطوتين , ما أحب الخطوات الكثير بس الريفيوهات الي شفتها في اليوتيوب عجبتني , سعرها 12 دولار .
طبعا مايبلين متوفره عندنا لكن الشدوهات الكريميه حقتهم اسمها كلار تاتو مو متوفره عندنا كل الالوان أخذت كحلي , وردي , موف , سعرهم7 دولار للحبه .
طبعا أنا الي دحين ما لقيت شدو لون موف مناسب لبشرتي فا قلت خلني أخذ الشدو المنثور هذا احطه فوق الكريمي و نشوف النتيجيه أيش تطلع , سعره 7 دولار .
من لوريال أخذت الانفاليبو ايشدو مررره مدح كبير عليهم , أخذت أخضر بعد ماشفت فيديو بتستخدمه على طول حطيته في اللسته , و أخذت وردي حتى يمشي مع الشدو الكريمي سعرهم 7 دولار .
من نيكس أخذت بلاشر كريمي جربته قبل كده و فزيع فا حبيت أخذ لون تاني سعره 6 دولار , كحل او كونسيلر قلم بيج 6 دولار , الجمبو بنسيل اشهر من نار على علم دايما عندنا مخلصين أخذت ابيض و وردي سعره 4.50 دولار للواحد , و مثبت للشدو شبهته بحق ماك بينت بوت فا قلت يلا لونه ابيض صدفي سعره 7 دولار .
أشتريت زي - باليت مقاس أصغر لأنه في السفر حسيت أني أحتاج وحده اصغر او في شنطه مكياجي لو بايته عند احد واحد شدو و بلاشر و كده سعره 14 دولار .
هذه المسكارا من Physicians Formula هي المفضله عند وحده اتابعها في اليوتيوب , فا أخيرا حجربها و شكلها من برا مغري هههه سعرها 10 دولار .
وبرضو من Physicians Formula أخذت دي البلاشرين على اساس فيها اشياء تجذب و أو يزيد الحب عندك مدري كلام كفار كده هههههه 12 دولار للواحد .
نجي للكارثه دا ههههه فكرته الكونسيلر المشهور حق مايبلين و لمن جاني جا كبير قلت مو معقول كل الاشياء في الكاميرا تكون كبيره و لمن تجيك تطلع نتفه , و دا العكس , نزلته في انستقرام و كلهم قالولي دا الاساس الي ماشي مع الكونسيلر نفس النوع يعني , سعره 12 دولار .
برونزر من NYC مشهووور جدا انه من ارخص و احسن البرونزرات فا خلنا نشوف سعره 3 دولار .
من ميلاني اشهر بلاشر عندهم كل اليوتيوبر الي اتابعهم مدحوا اسمه Luminoso , لونه كده لا خوخي ولا اورنج ولا مشمشي شي بينهم كده .
ايلف ماتحمست لها كثير فا قلت أخذ أشياء خفيفه , فا أخذت برايمر للشدو لونه بيج سعره 1 دولار , و مثبت للمكياج زي فيكس بلس من ماك فا نشوف برضو سعره 3 دولار .
هذه الشدوهات مرره الكلام عليها كثير برضو و مو متوفره عندنا من مايبلين , سعرها 10 دولار .
و ختامها مسك أكثر أكثر شي متحمسه لها هي ماركة ويت اند وايلد أخذت مجموعة شدوهات الصغير ب 3 دولار و الكبيره من 5-7 دولار , و أرواجهم المطفيه سعرهم 2 دولار , باين الحب من قبل ما أجرب شي أخذت أشياء كثير هههه .
و بس طبعا الريفوهات قادمه ان شاء الله أتمنى عجبكم ولو تحبوا ريفيو عن منتج معين فا قولولي في الكومنت او في انستقرام حتى أستخدمه أول لانه في أشياء لسه مافتحتها فا خلني أعرف شنو تحبوا تشوفوا أول و سلامتكم و انتظروا مشترياتي ال High End .
مشتريات أخرى من أمريكا :
No comments:
Post a Comment
لأي استفسار أتفضلوا...®