بسم الله الرحمن الرحيم
السلام عليكم , اليوم الريفيو لباليت جديد حينزل بالسوق الخليجي و السعودي بالتحديد يوم 1 سبتمبر بفروع سيفورا , الباليت هو الاصدار الرابع من باليتات نيكيد المشهوره و الصراحه جا فجأه يعني ماكان في اشاعات او اخبار قبلها على طول لقيتوا نازل , يعني له نازل بامريكا قريب 3 شهور كده ماطول عبال جانا و هذا شيء جدا ممتاز انهم صاروا يحسوا اننا بشر هههه .
سعره 279 ريال / سعودي , الباليت تغليفتها بلاستيكيه بعكس خليفاتها الي كانوا شمواه و علب معدنيه ,, مزينه ( كيف بس مزينه ) بدخان يعكس اسمها و دا شي حلو , قفلتها مغناطيسيه وهذا شي دايما يبعث السعاده لمن تسمعي التك حق القفله هههه , الباليت يحتوي على 12 لون كالعاده , متنوعه بين القليتر و الساتان و المطفي , يجي معها فرشه بطرفين وحده مثل القلم و الثانيه للدمج , طبعا انا في الشهر الي فات حطيتها تحت الاختبار حاولت اسوي لوكات مختلفه و متنوعه عشان اعطيكم رأيي نهائي عنها فا يلا نشوف .
High / هاي : فاتح بلمعه ناعم جدا مافيه قليتر واضح أحسن شي على الجفن تحطي بيدك تحت ستيكي بيس , و هايلايتر على عظمة الخد مره حلو .
Dirtysweet / ديرتي سويت : لون تان يلمع برضو لونه على الجفن مو مره يبان الا لو حطيتي بيس تحته لونه ابيض .
Radar / رادر : بني برونزي يلمع , كنت مره متحمسه له بس شوي اللون باهت مو زي ماتخيلته يكون .
Armor / أرمر : فضي رمادي بحبات قليتر , أتعب اقول يجنن هذا اللون اللقليتر الي فيه راقي جدا , طبعا بفيكس بلس يثبت القليتر اكثر بس اللون خطيير رقم واحد عندي بالباليت .
Slanted / سلانتيد : فضي بس على زراق اكثر فيه لمعه معتدله , نتعم و يندمج بسهوله .
Dagger / داقر : امم ممكن نقول رصاصي مايل للازرق غريب اللون و حلو في لمعه بسيطه بس ماتبان على العين يعني نقدر نقول انه مطفي , حلو تغمقي فيه الاطراف و تحت خط الرموش السفليه .
Black Market / بلاك ماركت : رصاصي او كحلي غااامق أقرب للاسود لمعته بسيطه زي الي قبله يعني تقدري تعتبري مطفي ناعم و سهل بالدمج .
Smolder / سمولدر : اااخ دا الموف البذنجاني الغامق قااتل موف غامق بلمعه يجنن سهل الدمج بثواني يندمج اللون يبان من اول حطه خطير مره أحبه .
Password / باسورد : لون رمادي مطفي جدا جميل لتغميق الكسره و تحطي على خط الرمش السفلي و برضو يبغاله دمج كثير .
Whiskey / ويسكي : لون بني مافيه احمرار , ينفع للدمج كالون انتقالي على الكسره , شوي صعب بالدمج و يبغاله فرشه كويسه للدمج .
Combust / كومبست : لون موف وردي رمادي ينفع برضو لون انتقالي بس للبنات الي بشراتهم فاتحه , اللون غريب و حلو .
Thirteen / ثيرتين : ابيض او لولي فيه شوي شيمر بس غالبا مطفي , امم طبشوري مره ما حبيته على الجفن بس على عظمة الحاجب اوك .
تقيمي النهائي للباليت أنا أشوف الوانه متنوعه من البارد للدافي مع انه البارد طاغي اكثر , بالنسبه لانها سموكي باليت الصراحه بثواني تقدري تسوي فيها سموكي لوك , عمليه أقدر اخذها بسفر لوحدها و أقدر اسوي فيها كذا لوك من الفاتح للغامق من الثقيل للخفيف , وجود الالوان المطفيه شيء جدا مفرح لانه الباليتات الي فاتت كان قليل فيها المطفي , بالاخير لو كنت من محبين باليتات نيكيد بالاجمال اتوقع تعجبك مره لانه البقيمنت في هذه الباليت اعلى من كل الباليتات , لو كنت تبغي الوان غامقه متنوعه في باليت صغير حلوه راح تعجبك , بالنسبه لمحبات الشدوهات كما وصفت سابقا بعض الالوان صعبه بالدمج و البعض بيكون زي الزبده فا شوفي اللوان الي عجبتك لو كانت زبده خذيها , الفرشه الي معاها مو مره حبيتها , و اي اساله ممكن تسيبوها بالكومنت أول مره اسوي ريفيو عن باليت بالكامل فا اتمنى عجبكم طريقة الريفيو و لو حابين اسوي ريفيو لباليتات ثانيه برضو حطوها بالكومنت .
التقييم /
B
No comments:
Post a Comment
لأي استفسار أتفضلوا...®