السلام عليكم و رحمة الله و بركاته
أنا ماراح أخلص من المصححات و دائما حجرب أشياء جديده حتى أستقر على أفضل واحد أو لحد ما ألقى حل لهالاتي , المصحح شيء أساسي للبنت الي عندها هالات مهما كان الكونسيلر قوي راح يقلب رمادي مع الوقت من غيره .
حبيت أجرب منتجات لورا مرسييه لأنه سمعت مدح كثير عليها , و لأنها مو موجوده بالسعوديه فا لمن أسافر دائما أدور على ماركات جديده , الماركه بشكل عام تحسيها كلاسيكه بسيطه مافيها تكلف و أنيقة في نفس الوقت , أسعارها حسيتها متوسطه مو جدا غاليه زي شانيل و ديور طبعا تبعي خلاص على نهايته لأني أستخدمه مع مكياج ثقيل أو خفيف فا قلت حان الوقت لعمل ريفيو .
المصحح أخذته من دبي تحديدا دبي مول محل بلومينغديلز , سعره 99 درهم / إماراتي , حجمه 1.7 جرام , متوفر منه درجتين الي عندي درجة orange / yellow , مصنوع بأمريكا , مدة صلاحيته 18 شهر .
مميزاته : حاولت أستخدمه مع مصحح بوبي براون ( هنا ريفيو كامل عنه ) و أشوف الفروق بينهم و مين افضل ممكن أنزله في أنستقرام مقارنه , أول شي لاحظته أنه كريمي و وزنه خفيف , يوضع الكونسيلر فوقه بكل سهوله , يندمجوا مع بعض سريع و لوحده يندمج مع الجلد بشكل جميل و بسرعه ما أتعب و أنا اوزعه , حجمه كويس طبعا أتمناه يكون أكبر بس مناسب جدا للشنطه و السفر ماياخذ مساحه , علبته بلاستيك سلسه جدا لونها موف غامق مع قليتر صغار , أكيد يخفي من كمية الهالات الموجوده تحت العين جدا مريح في الاستخدام أكثر من بوبي براون , و بما أنه خفيف الوزن فا ما كتل معي تحت العين , استمتعت و أنا استخدمه و أكيد راح يكون في بالي أني أرجع أشتريه هذا اذا مالقيت شي أحسن منه .
عيوبه : كا منتج الصراحه ما شفت عيوب , لكن علبته من ناحيه انه الغطاء لازم ينفك كامل فا أحس دايما خايفه انه يضيع و يصير مكشوف , لمن وصل للنهايه صار صعب جدا احطه باصباعي لازم فرشه ( طبعا هذا لمن أكون برا لأني مابشيل كل الفرش ) .
يستحق الشراء او لأ ؟ يستحق .
ِA .
No comments:
Post a Comment
لأي استفسار أتفضلوا...®