بسم الله الرحمن الرحيم
كريولان يا كريولان كل خبيرات التجميل يستخدموها و كلللهم يعملوا الكنتور الي مجننا فيها , فا ما كان القرار الا اني أروح و أشتريها و أشوف بنفسي هل تستحق كل هذا السيط العريق في أخفاء الهالات و نحت الوجه و هو عباره عن أساس كريمي عااالي التغطيه .
أشريته من محل روج بمجمع الشرق , 185 ريال/سعودي , حجمه 40 جرام و أشوفه جدا جدا كثير , صالح لمدة سنتين , مصنوع في المانيا , متوفر منه 4 درجات تفرق في اللون البيج الكبير لكن الغامق و الاصفر ثابتين نفس اللون في كل الباليتات درجتي B اغمق وحده , قوامه غريب كريمي بس خفيف تحسي ممزوج مع زيت فا لازم يتثبت عدل يعني مو زي مايبلين الكريمي هذاك أسمك .
يناسب أي نوع بشره ؟
انا حسيت أنه الدهنيه لازم تثبته , و الجافه مايندمج بسهوله معاها بالذات بعد كم ساعه يبدأ يبين العلامات التعبيريه فا رطبي كوووويس , و حيمشي مع البشرتين .
مميزاته , مطفي تماما , تغطيته عاليه جدا بالذات في التصوير يخلي الوجه مرايا و ابدا مايعكس فلاش حتى اللون الأصفر , يمد بسرعه و بسهوله و هذه ميزه و عيب , حجمه يجلس معك السنتين كلها و لا يخلص , ينفع أساس و كونسيلر , و الاهم الاهم الكونتور أيش اقول و ايش اخلي أحلى كونتور أستخدمته لحد الان بالذات اللون الاصفر للاضاءه تحسي شمس تحت عينك من اول مره و الاحلى لمن تثبتي بالبنانا بودر أكثر أضاءه تنور من قلب , الدرجه الغامقه حلوه بس أنا لازم أثبتها ببودره ما حبيتها لوحدها , جدا جميل لتنظيف الحواجب و يعطي اضاءه ( أنا أستخدم اللون الاصفر بس ممكن تخلطي معاه من البيج عشان تخففي ) و كمان ميزه الخلط أنك تقدري تلعبي لين تطلعي بلون يناسب بشرتك , مره عجبني ما أتوقعته يكون كده و أحلى شي معاه البيوتي بلندر عشان تخفف منه , يعني البنات الي في الافراح ركزوا قلت الافراح تحتاجي شي يغطي لك أستخدمي بس لازم لازم معاه مصحح , ثاابت للنهاية السهره و تندمج معاه البلاشرات بسهوله .
العيوب , أول عيب علبته الغطاء ممكن يضيع في أي لحظه أحس و لو ضاع راح يتلوث , حجمه كويس مو انك ماتقدري تاخذي معاك الا عادي حجمه وسط , خلط الالوان الصراحه يبغاله خبيره بالنسبه ليا حسيته صعب مرات يفتح معي مرات يغمق ماكنت جيده في هذه الناحيه لو غلطتي على طول تصيري طحين زي الكوفيرات ههه , سهل المد عيبه انك تحطي تحت عينك تدمجي تلاقي وصل تححححت فا تعلمت أنه أحط قليييل و أزيد قد ما أبغى بعد الدمج , 100% ماهو للاستخدام اليومي , طبعا أنا كنت أستخدمه في مناسبات مختلفه كا خفيف أو ثقيل عشان التجربه لاحظت أنه أول ما أحطه يبدأ وجهي يحكني و خشمي يصير أحمررر و تطلع لي كم حبه , بس أستمريت حتى أعطيه حقه و اعطيكم ريفيو كامل , سبب لي حساسيه و الان وجهي كله حبووب جبيني تحت عيني خدودي فوق شفايفي كل مكان حطيته فيه ( ماأعرف لمن أشتريته كان في نقط مويه قلت أنا رطوبه من التخزين ممكن تتوقعوا منتهي ؟ بس أختي ما سوالها شي ) بس المنتج عجبني لو ماسبب لي حساسيه اكيد كنت راح أستعمله دائما بس للاسف الشديد جدا جدا زعلت .
 |
| أعتذر أنه الصوره مغبشه بس الكتابه جدا صغيره |
أنا ماحسيته غطى هالاتي مثل ما أنا أبغى فا طريقتي هي أحط مصحح ( كوركتر) برتقالي , فوقه من اللون البيج و بعدها أدمج بالبيوتي بليندر , و بعدين أحط اللون الاصفر و ادمج و احط البنانا بودر للتثبيت من غير تثبيت خطط معي شوي , مفتاحك معاه أنك تحطي شويه شويه لانه بسهوله يخطط معك و يكتل فا أنتبهوا .
صدمتي فيه كانت أنه مكتوب على العلبه تركيبه خصيصاً للحالات الملحه و للأشياء الطبيه , السؤال ليش أغلب الخبيرات تنصح فيه أنا الصراحه أشتريته بسبب مدحهم الكثير , برا ما يستخدموا الا الدراق كوين ههههه , فا هو حلو و أنا زعلانه أني أقول ايوا أنصح فيه لانه يخرب البشرات هههه , و يبغاله أحد فاهم يعني لازم تعرفي تدمجي عدل حتى ما تقولي عيبه يخطط لا أنت لازم تتعلمي بس منتج يستحق الاقتناء لو تحبي الكونتور و الهايلايت .
أي شي ماغطيته أو وفيت حقه دائما دائما لكم الحق و المجال مفتوح أنكم تسألوني حتى أضيف المعلومات لكم معلوماتنا متبادله و كلنا نبغى نفيد و تفاعلكم معي يسعدني , ضيفوني على انسقرام حسابي هو Raneem_Ism .
التقييم /
B
No comments:
Post a Comment
لأي استفسار أتفضلوا...®