أكيد أغلبكم عرف خبر أنه توفرت البيوتي بليندر بسيفورا دول الخليج و لله الحمد , فا تشريفاً للخبر قلت أكتب ريفيو عنها و أتمنى تنال على أعجابكم .
جاتني هديه من مسابقه كسبتها من حساب بالانستقرام اسمه beautyinlove_shop سعرها 90 ريال / سعودي , في منها ألوان كثير اشهرهم الورديه , و منها الابيض و الاسود و حجم صغير صدر مؤخرا لونه ليموني , نزل معها منظفات خاصه فيها حتكلم عنها .
فكرة البيوتي بليندر أنها أسفنجه مصنوعه بشكل يخلي وصولك للاماكن الضيقه أسهل , مصنوعة من مادة غير عن الاسفنجات الأخرى .
مميزاتها : سرعه الدمج , تدمج الكونسيلر بثواني بالذات لو أنك تمكيجي أحد مره مريحه لك حتكون , تخلي كل شي شكله طبيعي و تشيل الكميه الزايده من الكونسيلر الي ماتحتاجيها , أنا عني أحب أحط فيها بودرة تحت العين تعطيني تغطية عاليه , ما تخلي في الوجه خطوط مثل الفرشه , جدا أحبها مع البيبي كريم دقيقه و انت مخلصه و كل شي مدموج مضبوط , أنصح فيها اذا عندك مشاكل بدمج الكونسيلر , اذا ماتحبي اساسك يكون ثقيل على وجهك , أنصح فيها المبتدئات و كل البنات الصراحه راح تغير مكياجكم للأفضل , تعطي الوجه شكل ديوي و ماتخليك مطفيه مسطحه .
العيوب : ماهو عيب لكم لكن أنا أحب الأساس تغطيته عاليه فا أحسها تسحب من التغطيه فا طريقتي اني أوزعه بفرشة الاكسبرت من ريل تكنيك و بالنهايه اطبط بالخفيف بالبيوتي بليندر , و الاهم أنك تحطي المنتج على وجهم و تطبطبي لو حطيتي الاساس على الاسفنجه على طول راح تتشربه فا أنتبهوا .
و بس حلوه بكل المقاييس و هي ثورة في عالم المكياج تستاهل كل ريال حقيقي , بس أهم أهم شي تستخدميها و هي مبلله .
هنا مبلله
 |
هنا جافه
طريقة تنظيفها متعدده أنا عني أشتريت الغسول الخاص يجي سائل و صلب أخذت الصلب لأنه كان عليه ريفيو أفضل من السائل , صح غالي الغسول لكن ينظفها و يرجعها جديده و ماتتقطع مع الوقت و هو عباره عن لوح أبيض تمرري عليه الاسفنجه و هي مبلله و تفكريها برفق و تنظفيها بالماء لحد كل شي يخرج و تكرريها ثاني اذا لزم , كثير من الي يستعملوا الصابون العادي و المايكرويف تتقطع معهم بعد مده , بس ممكن تستغني عنه و تنظفيها بالصابون بس تكوني لطيفه معها و ماتفكركي بقوه .
التقييم /
A
No comments:
Post a Comment
لأي استفسار أتفضلوا...®