السلام عليكم و رحمة الله و بركاته
اليوم الموضوع عن الزي باليت في ايش تستخدم و اذا تحتاجيها أو لا , الزي باليت علبه بسيطه في شكلها و لكن عظيمة فكرتها , أول مانشوفها ماراح نستوعب أيش هي و في ايش تستخدم , خلينا نتعرف عليها أكثر هي علبه من الورق او الكرتون المقوى من داخلها أسود تحت موجود قطعة مغناطيس و ظيفتها تثيت أي قطعه حديد عليها و في حالتنا حتثبت الشدوهات و البلاشرات و اي شي مثلهم , متوفر مجموعة أحجام كبير و صغير وسط و شي عريض للبلاشرات و كده و ألوان كثير شي ساده و شي مرسم عليه تناسب كل الأذواق , أشتريتها من أمازون , أخذتها ب 17 دولار يعني 64 ريال / سعودي تقريبا , مقاسها وسط , جاني معاها هديه شدو من ميك أب قيك لونه أسود .
بعض الشدوهات تجي ماتكون علبتها حديد زي ماك فا ماغفلوا عن دا الشي و جابوا معاها دوائر حديد تلاصقيها من تحت الشدو فيها غراء و تلصق على طول , هل هي قابله للاستخدام أكثر من مره ؟ ممكن لو حافظتي عليها و ماكنت عفشه معاها مثلي .
 |
| تجي الحدايد مغطايا |
 |
| وهنا حجمها بالضبط على قد مقاس شدو ماك |
طيب أنا أستخدمها في أيش ؟ لمن أشتري شدوهات تكون مفرده زي عندي من ماك و من بسام فتوح لمن تكون مفرده أو تعبئه زي مايسموها تكون أرخص في السعر فا لمن تشتري من كم ماركه الاحجام تكون مختلفه و الاشكال فا ماراح تشتري علبه من كل ماركه عشان شدو واحد مثلا فا فكرت أنها حتجمعهم سوا و مرتبين , و الاحلى انك تحطي الشدوهات و البلاشرات الي تبغي تستخدميها كلها في علبه وحده و تاخذيها بالذات لمن تكون البلاشرات جايه في علبه في مجموعه مع بعض غالبا تكون جدا كبيره للسفر او في أي مكان فا الي أسوي أنه اطلعهم من علبهم و الصق الحديده فيه و خلاص .
تقدري ترتيبهم بالشكل الي تبغي طبعا ولا حظوا أنه عندي 3 أحجام مختلفه و دا الحلو كلهم مجتمعين في مكان واحد , نجي لغلطه أنا عملتها أنه مسكت الشدوهات الصغيره الي تجي في علب كبيره خرجت الالوان الي احبها و جطيتها على القطعه الحديد فا مره صغير الشدو عليها فا طبعا جا شدو على الغراء و صارت ماتلصق بس دي غلطتي أنا طبعا لكن دحين صرت أحط مقاس مناسب حتى تكون محميه , لكن طبعا ما رميتهم مسكت غراء مسدس و لصقتها في الشدو من تحت , تجي معاه 8 حبات و تقدري تشتري من امازن دي الحدايد لوحدها و سعرها رخيص أعتقد 30 حبه ب 5 دولار بس.
بالنسبه انها هل تحفظ الشدوهات في مكانها و كيف ماتتكسر و كده أنا مرتبه لمن أنظم شنطة مكياجي فا ماواجهت مشكله سافرت فيها و لا شي اتكسر الحمدلله , و لكن أختي أخذتها مني و شويه حاست الدنيا يعني مو اتكسروا لكن كان في شدوهات متناثره , فا هو يعتمد على الشخص و الاهتمام لكن زيها زي أي علبة مكياج و قويه و صورت صورة و انا قالبتهم عشان تشوفوا أنهم ثابتين .
في الاخير هي منتج رائع ماندمت أني أشتريته و أستفدت منه الحمدلله , لا تشتري أذا ماعندك حاجه أنك تشتري شدوهات مفرده و انك تشكلي بنفسك الي تبغي , بس الورق المقوى ماحسيته عملي لكم سنه قدام بس أنه مخليها وزنها خفيف .
التقييم /
B
No comments:
Post a Comment
لأي استفسار أتفضلوا...®