السلام عليكم و رحمة الله و بركاته
حبيت أكتب موضوع عام أحط فيه مختارات تدخلي فيها للصيف و بعدها ان شاء الله بنزل مواضيع خاصه بالصيف قد ما أقدر .
نبدأها مع حماية من أشعة الشمس أنا الصراحه ما أحبه و لا أحبه تحت مكياجي لأنه بشرتي مختلطه لكن لو بشرتك تتحسس من الشمس و على طول تجيك حروق لابد منه في وجهك و جسمك .
و طبعا الصيف و الحر لازم لازم كريم مرطب و الفازلين مايخلو منه أي بيت , و كمان ما تنسي شفايفك ترطيبها و تقشريها عشان تحطي ألوان الصيف القويه على شفايفك , و طبعا شرب الماء .
بعدها أحس لابد نظاره حاليا أنا طايحه في اللون البني دي غالبا نظاراتي تكون سودا لكن عجبتني دي و الأحلى أنها رخيصه فا لو رحت كباين أو مسبح عام ما أخاف عليها تضيع أو تنسرق خلوا دا في بالكم بالذات لو كنت ما تنتبهي على اغراضك .
بعدها نجي لأهم و أكثر شي الناس تنتظر الصيف عشانه الي هو التشميس و توابعه فا الي أستخدمهم أنا حاليا بنانا بوت و أتعب أقولكم فزيع .
طبعا مو الكل يقدر يطلع بحر و يتشمس أو حتى مافيه حيل يجلس كم ساعه تحت الشمس فا برضو تقدري تاخذي لون تان من التان الصناعي البخاخ بالبيت طبعا حتكلم عنه بالتفصيل في موضوع منفصل ان شاء الله .
بعدها لمن تطلعي من البحر أكيد مش حتسيبي شعرك يصير كشه أو أنك تسشوري أذا مافي وقت أو طاقه حتى فا شي ضروري تجيبي بديل زيت و توابعه أنه يعطيك تموجات بشعرك تناسب البحر و جو الكباين بس نصيحه لا تكثروا منه لانه ينشف الشعر بس يوم يومين ماراح يسبب مصيبه ^^ .
و نكمل مع الشعر ضروري ضروري للبنات الي شعرهم ناعم أو البنات المتحجبات في الكباين أو شعرك دهني حيلصق شعرك من الحر فا لمن ترجعي و تتضبطي لازم تستخدمي الشامبو الجاف عشان يرجع الحيويه لشعرك و يعطي كثافه من عند الجذور فا ضروري تشتري و تخلي في شنطه البحر .
و بعدها شي بسيط معرف اذا تهتموا فيه انتوا بس أنا أحب المناشيف تكون فيها حركات و لونها مفرفش .
ندخل في الاكسسوارات و أهم قطعه لازم تكون عندكم تنفع لفستان صيفي بسيط او مع تيشيرت أبيض هي Statement Necklace أو السلاسل الكبيرة الي فيها حجر كبير و فيها أشكال و أنواع ألوان و أحجام لا تعد ولا تحصى الا ما تلقي شي يناسب فا دوري لين تلاقيها و خذيها بسرعه بس طبعا لا تاخذوا عشره خذوا ألوان تناسب مع أغلب ملابسكم أو لون انتوا تحبوا تلبسوا مع الابيض و كده و ممكن تاخذي ألوان أساسيه زي الابيض و الأسود .
بعدها الاساور هو رجعت موضة الاساور الكبيره بس هي عفشه على البعض فا خلنا في الاشياء الناعمه و اللون الطاغي بالاكسسوارات الساده هو الذهبي و مره حلو مع التشميس هو فا خلكم مع الأساور السايبه على اليد و حطي كم وحده جنب بعض مره حلوين .
و للبحر و للبنات الصغار في المتوسط الاساور الملونه و أساور الخيط حلوه لكم , أنا أحب لمن أسبح ألبس أساور الخيط فقط للبحر غير كده لا تلبسيها لانه موضتها طفت للكبار و لو تبغي شي ملون يكون برضو داخل فيه الذهبي .
و طبعا طبعا موضه كبيره الخواتم الصغيره ابدا لا تفوتيها و حطي الكميه الي تعجبك مو لازم يدك تكون كلها مليانه خواتم ممكن بس اصباعين , أنا عني على حسب المزاج , موضه لاتفوتيها و أنا عندي فقط ذهبي و فضي الملونين ماحسيتهم حلوين لأستخدام دائم .
بالنسبه للروائح الي مهمه نهتم فيها طوال السنه طبعا , لكن مع الصيف و المويات الكثير لازم تهتمي أكثر أنه ما تبان فيك ولا نص ريحة , أنا عني أحس الصيف روائحه تكون تروبيكال زي الحمضيات , الليمون , البرتقال , جوز الهند , روائح النظافه , لأنه غالبا طوال أيام السنه أحب أكثر الفانيليا و الحلويات , طبعا الكلونيات دي بالنسبه للعزايم لأنه في الأفراح الأمور غير عندنا بالذات , ممكن تغيري كل شي لروائح خفيفه و منعشه .
شمعة الصيف من يوم أشتريتها و أنا قلت مش حفتحها دحين لأنه مو حلوه في الجو البارد لكن دحين جدا تنعشني الصراحه و بجد بس أجلس أشمها حتى و هي مقفله فضيعه مره و صيفيه من أسمها من باث أند بودي وركس .
بخاخ للجسم من باث أن بودي ماراح تلاقوا عندنا للأسف بس دا الي عندي مانعينها عشان أسمها تخيلوا بتلاقوها بدبي جنبنا ههه بس أي شي مشابه ممكن تحطي في شنطة البحر هذا و علبته بلاستيك فا ماتخافي عليه بس عيبه حجمه كبير مره بس أكيد في أحجام أصغر
بالنسبه للكلونيات حطيت لكم غالي و رخيص , الغاليه من ايلي صعب ريحتها على ليمون جدا صيفيه , و أثنين من باث اند بودي وركس و كلهم خفاف . و ندخل في المكياج و توابعه شوط كبير صح .
أهم شي عندي البرايمر مهما كان نوعه مها كانت مهمته المهم شي قبل مكياجي أحط شي , في أنواع كير خافي للمسام , مرطب , يعطي وجهك أشراق , يشد الخطوط , يخفي الحمار و القائمه تطول شوفي أيش مشكلتك أول و جنب المعالجه الطبيه طبعا خدي الي يناسبك ريفيو عنه .
نجي أول شي للبرونزر طبعا الصيف و الحر أنا عني حستخدم برنزر شانيل لكامل وجهي لو لأنه التشميس لمن يبدأ يروح أول مكان يروح من وجهي فا حق شانيل أكثر واحد أعطاني لوك طبيعي فوق الأساس الفاتح حقي , غير كده ممكن تحطي و انت تسبحي بس لسه ما أختبرته أذا يجلس ولا لا لأني بحط كريم التشميس فا ما بحط مكياج في وجهي هههه و لكن لو أنك ما بتسبحي و بس جالسه جنب المسبح دا حلو و طبيعي و ماراح يقطع معاك بعد فتره زي البودره , غير كده حجمعه مع البرونزر البودره حتى يصيروا ثابتين أكثر في وجه الحر .
بعدها كونسيلر قوي و خفيف في نفس الوقت , قوامه خفيفه زي ماك برو لونق وير , بعدي عن الكريمي لأنه حيخطط معاك مع الحر و الشمس .
طبعا الصيف يجي معاه دايما الأكحال الملونه , في مليون طريقه لوضعها مو شرط تكون كل عينك زرقه ولا خضرا و لكن لو بدك تجربي شي جديد و الوان جديده الصيف فرصه , لو مره ماتحبي ممكن تحطي ايلاينر ذهبي مو مهم دايما اللون يكون فاقع أنه تغيير عن الأسود بشكل عام , ممكن تعملي طريقة الدبل لاينر حطي بني بعدها الذهبي فوقه .
و طبعا طبعا مسكارا و ايلاينر و روج ضد المويه الي تحبي بس ضروري يكون عندك شي ضد المويه أنا أحط مسكارا حتى لو بتشمس ^^ يعني لو في ناس معايا طبعا بس ههههه ( ميك اب فور ايفر سموكي لاش مسكارا , ريفيو ماسكارا ذا تيربو فوليوم اكسبرس من مايبلين , تقييم ميك اب فور ايفر أكوا لاينر .
و شي مهم و لا تغفلي عنه هو الاضاءه ضروووريه مع التشميس عشان تعطيك حياااه لوجهك و أخترتلكم لونين ذهبي و لون الشامبانيا أحسهم أكثر أثنين مناسبين لكل الوان البشره .
بالنسبه للشدوهات حتكون مقسمه بين طبيعيه الي هي البرونزيات , الذهبيات و البنيات دول أعتمديهم أي وقت ريفيو نيكس ايشدو .
و بين الملونه الأزرق الملكي حاضر بقوه دا الصيف بالنسبه للسهرات و حتى للعرايس بس طبعا ابدا ما أنصح فيه للعروسه , احس ملون لازم يكون الموف حاضر بينهم و ينفع تخفيفي للنهار او ثقيل لليل بس طبعا مو تروحوا كباين و تحطوا ملون لأ لكل مقام مقال خلوهم في مناسبات منزليه و أفراح و كده ههههه .
البلاشرات متنوعه و تناسب كل الأذواق كمان زيها زي الأرواج الألوان تترواح بين الفاقع الي هي المرجاني و الاوركيد , للألوان الطبيعيه الهاديه الي بس تعطيك حياه .
الوان البلاشرات اغلبها الوان مرجانيه , برتقالي , و بعض الالوان الهادئه زي الروزي .
و بعدها و دي الي أنا هابه فيها الي يكون فيها حبات لمعه ذهبي بسيطه تعكس لك أشراق على الوجه و في نفس الوقت اللون فخم شوفوا لاحظوا أنه الماركات مو رخيصه لدي النوعيه لأنه أحس الغالي بيكون فيها الحبيبات جدا ناعمه و صغيره عكس الرخيصه , بس أذا ماعندك طبعا مافي مشاكل و كمان الرخيص يخليك تشوفي هل تحبي لمعه في بلاشرك قبل تحطي فلوسك في الغالي التصوير شوي مو مبين بس جربوهم في الطبيعه .
الأرواج برضو مو كلها ماركات معروفه بس قيسوا الألوان على أي ماركة تحبوا .
نرجع لتقسيم الأرواج أولها الأورنج , طبعا الي ترتاحي عليه من درجه في أورنج محمر في أورنج صريح مطفي بلمعه الي يريحك بس المهم أورنج في النهايه هو طالع في الربيع و حيكمل للصيف .
و طبعا ما ننسى لون السنه الي هو الاوركيد الصراحه اللون صعب و لكن شفت كثير بيحطوا سواء مع مكياج كثير أو قليل فا شوفي الي ترتاحي عليه
بعدها الفوشيات و الألوان الي تحتاج رسمة عين و لبس جدا بسط عشان تبرز لوحدها اوك لانه الفوشي مرات يطلع مش ولا بد كده لو أتجمع مع أشياء غلط .
بعدها اللون البطيخي و المرجاني .
الأحمر طبعا و حكايته نفس الفوشي تبغي تحطي حطي مع عين بسيطه .
و أخيرا الي أنا حابتهم الفتره الأخيره و هم اللحميات او النيود , لاحظوا الي عندي كلهم لحميات بلون مو بيج عشان لا أطلع ميته كل مافتح لون بشرتك تقدري تفتحي اللون و جدا جدا جميل مع التشميس حقيقي هو أكثر لون ححطه من بين الكل .
و نختمها بالمناكيرات في الوان كثير دارجه بس طلعت من الي عندي و بانت مشكلتي في اعادة نفس اللوان دايما ههههه .
عندك أكيد الأورنج قوي هذا الموسم و اختاري الدرجه الي تريحك طبعا خفيفه ثقيله عادي أهم شي مو نيون بليز .
الأزرق أنا من عشاقه فا لازم أدخله .
بعدها الألوان الباستيل مع التشميس فزززيعه و هي بديل لألوان النيون دا الصيف الي ابدا مارجع سوقها و لله الحمد .
الفرنش مناكير للأفراح جدا راقي و موضته ماتروح حطيت لكم لونين واحد على بيج واحد على زهر أختاري الي يريحك .
و اخرها و أهمها اللون الذهبي زي ماقلتلكم وجوده مهم دي السنه حتى في المناكير حطي في اصباع واحد مكمل للألوان الثانيه و او تعملي فيه رسمات فوقهم او تحطي في يدك كلها المهم حاولي تدخلي .
و بس هذا كل الي عندي أتمنى تكونوا أستفدتوا و أستمتعتوا من الموضوع و عجبكم أتمنيت لو عندي خبره في الأزياء أكتب عنها بس ماكو للأسف .
No comments:
Post a Comment
لأي استفسار أتفضلوا...®