السلام عليكم و رحمة الله و بركاته
و أخيرا أقتنعت و دخلت في عالم البيبي كريم و شكلي ما بخرج منه , كان الكل يتكلم عنهم و أنهم مناسبين للأستخدام اليومي , و أنا الصراحه كانت خرجاتي أغلبها سهره و لو أبغى شي خفيف أحط كريم أساس مع شويه كريم مرطب للوجه و أحصل على تغطيه بسيطه , بس لمن أحتجت شي يكون خفيف في شنطة مكياجي و سهل الاستعمال على طول فكرت في البيبي كريم و لأنه بشرتي دهنيه كان أكثر شي لافت نظري بيبي كريم ريميل , فا اليوم حقدم لكم ريفيو عنه أتمنى ينال على أعجابكم .
بقولكم معلومه خاطفه عن أيش الفرق بين الأساس و البيبي كريم ؟
الأساس عباره عن مكياج بعضها تكون فيها حماية من الشمس و بعضها لا و هذا العنصر الوحيد للعنايه الي تقدمه أو الي أنا أصدقه , البيبي كريم غالبا يكون فيه كم عنصر للعنايه بالبشره تختلف عددها من واحد للثاني .
فا بيبي كريم ريميل فيه 9 عناصر يوفرها في منتج واحد راح أذكرها لكم و حنشوف هل هي صحيحه ولا لا :
- يقلل من مظهر المسام .
- يوحد لون البشره .
- يعطي مظهر مطفي للبشره .
- يسيطر على الدهون طوال اليوم .
- ينعم البشره .
- يرطب البشره .
- يخفي الهالات السوداء .
- يساعد على عدم ظهور الحبوب .
- يعطيك تغطيه طوال اليوم .
أشتريته من سنتر بوينت , سعره أخذته بتخفيض كان بـ 32 ريال / سعودي سعره الاصلي مايزيد عن 50 ريال ,متوفر منه درجتين أنا أخذت الميديم , حجمه 30 مل مثل أغلب الأساسات و كويس جدا جدا لسعره , تغطيته متوسطه الى مرتفعه , ثباته متوسط يعني جلس معايا 3 ساعات يبدأ يخف من جوانب وجهي , مناسب للبشرات المختلطه و الدهنيه , قوامه سائله بعض الشيء بس مو مره خفيف.
مميزاته , أول و أهم ميزه أنا كنت أدور عليها أنه مطفي تماما , خالي من الزيوت , فيه نسبة حماية من الشمس بنسبة 15 % , تغطيته متوسطه و مرتفعه لبيبي كريم يعني مايغطي الحبوب ممكن تزودي طبقه ثانيه فقط على الحبوب لانه تقدري تزيدي طبقات و تزيد التغطيه بس أنا ما أفضل أكثر من طبقتين لأنه يبدأ يكتل فا غالبا أكتفي بطبقه للوجه كامل و للحبوب طبقه ثانيه و لو كنت أبغى اكثر استخدم كونسيلر , لكن الطبقه الأولى على طول تعطيك وجه صحي في ثواني و يوحد البشره , ما أستخدم معاه بودره الا لو كنت مطوله و فقط على التي زون ( الجبهه - الأنف - الذقن ) و الصراحه مادهن معي بشكل واضح , علبته سهلة الحمل في الشنطه و حجمها صغير قد كف يدي , مره أتوقع جيد للبنات في الجامعه صاحبات البشره الدهنيه .
عيوبه , ثقيل شوي على الوجه يعني هم كاتبين عليه أساس بيبي كريم فا تحسي أنك حطيتي شي على وجهك بس أبدا مو زي غارنييه الاصدار الاول اذا جربتوا لأ بعد مايثبت خلاص , شكله يبين أنه في مكياج بس خفيف يعني ما أحس مناسب في المدارس , معطر للاسف , ألوانه جدااا محدوده و مائله للوردي الدافي فا يعني لو كنت ذات بشره صفراء ماراح تلاقي شي يناسبك و هذا جدا محبط للكثير و للبنات السمراوات ماراح يناسبهم بيكون فاتح , يعني أنا و أنا متشمسه لونه كان كويس لمن فتح جسمي لا الدرجه الأولى الي على وردي ماراح تناسبني ولا الدرجه الثانيه لانها على برتقالي أو درجه دافيه ماشيه , ما حسيته قلل من مظهر المسام , ما حسيته يرطب البشره بالعكس لازم مرطب تحته اذا بشرتك مختلطه وفيها اماكن جافه جدا , مايخفي الهالات جربته مره و قلب رمادي قبل ما أخرج من البيت فا ما أفضل وضعه تحت العين , ما زال عندي حبوب و بتطلع حبوب جديده فا ما وقف ظهورها , تغطيه طوال اليوم أكيد لا لانه بالنهايه بيبي كريم و حدهم ساعتين , بالتصوير للاسف يعكس الفلاش شوي و يطلع وجهك أفتح من جسمك , العلبه حقه بما أنها توقف مقلوبه لاحظت أنه لمن أفتحه الاقي سائل من على العلبه من جوا بس مايطلع للخارج لا تخافي ماراح يعدم شنطتك بس أنه كل أفتحه أحس لازم أنظف الجوانب و الغطاء من الداخل و الصوره توضح .
طريقة أستخدامي :
أستخدم معاه أسفنجة بيوتي بليندر مبلله أحسن خيار لأنها تدمجه مضبوووط مع البشره و تشيل الطبقه الزياده , أوزع نقط صغار على كامل الوجه و في ثواني يندمج , بس ماحبيت توزيعه باليد و لا بالفرشه عملت لي خطوط و مايندمج مع البشره و يتكتل , أنا أفضل معه برايمر فيه لمعه شوي تحته فا يخفف من المظهر المطفي شوي بالذات في المناطق الجافه عندي .
بالنهايه أنصح فيه ؟ نعم أنا أكيد حرجع أشتريه لأني أستمتعت بأستخدامه و سهل حياتي و ما اشوف عيوبه تمنعني او كرهتني فيه , بس راعوا اللون و نوع البشره .
سواتش لبيبي كريم ريميل /
 |
| قبل الدمج |
 |
| بعد الدمج |
التقييم /
B
No comments:
Post a Comment
لأي استفسار أتفضلوا...®