كثير طالعه في الفتره الأخيره الأرواج السائله التي تتحول الي روج مطفي تماما , نزلت ماركات كثييرر الغالي و الرخيص , اليوم حتكلم عن وحده من الماركات الرخيصه و هي ماركة باليتا , تعرفت عليها أول شي من خبيرات التجميل الكويتيات بالانستقرام و كانت دايما تبهرني جمال ألوانها , فا يوم من الأيام كنت ببازار في معرض الحارثي بمدينة جده و بالصدفة لقيتها طبعا خذيت على طول 4 الوان لأني خفت بعد ما يخلص البازار ما ألاقيها , كان سعر الحبه بـ 20 أو 3 بـ 50 ريال / سعودي , بعض البنات يقولوا تلاقيها بأسواق طيبه بالرياض أو مهجه بجده يعني المحلات الرخيصه فا دوروا , حجمه 3 جرام .
مميزاتها , أكبر ميزه ألوانها لمن تصير مطفيه فضييعه حقيقي وقعت بغرامها حبيت الألوان الفاتحه اكثر لأنه أحس مو دائما تلاقي لون فاتح مطفي و مناسب للون بشراتنا , حجمها صغير مناسب للشنطه , قوامها سائل معتدل يعني ما تحوس و تخرج خارج الشفايف حتى لو من غير محدد و طبعا يعتمد على قدرتك و ثبات يدك بس من ناحيتي ما واجهت مشاكل , تتحول في ثواني للون المطفي , لا تخافي انك تاخذي ألوان مره فاتحه لأنه لمن ينشف يغمق درجه اللون , الصراحه من الأرواج الي كثير اتجهه لها من يوم ما أشتريتها , من ناحية أنها تنشف الشفايف و كثر في انستقرام أشوفهم يكتبوا أنها تنشف و كده أنا عني لمن أحطها مرات أحط تحتها مرطب مرات لا و ملمسها ما يضايقني و الجمال يبغاله تعب أكيد لمن تحطي روج مطفي لازم ما تحركي شفايفك على بعض لانه راح يتخبص أو يتقشر بس كل شي في الحياه له قواعد تتبعيها حتى تحصلي على أفضل نتيجه , أنا شفايفي بطبعها فيها خطوط فا مالاحظت أي من دا الكلام بس يعتمد عليك و أحتياطا قشري شفايفك و أهتمي فيها , جربت أختبار البوسه عليه فا الصراحه ما ينتقل الا شي بسيييط جدا على يدي , جميله جدااا في التصوير رااائعه أتعب أقول رائعه أحسها لأنها جدا مطفيه تعطي شفايفي امتلاء , الفرشه تبعه معرف أيش تسمى بس المهم أنها سهله في الاستخدام و عشان حجمها صغير فا ما تحوس الدنيا لأنه أنا فمي حجمه وسط , و شي حبيته فيها أنه الغطا يتفتح و يتقفل بكل سهوله أنا خفت ينشف الروج على الحواف زي المناكير بس الحمدلله ماصار , اللون تقدري بعد ماينشف تزيدي طبقه ثانيه و ثالثه عادي لحد ماتوصلي للدرجه الي تبغيها بس تكون يدك ناعمه حتى ماتقشر معك .
 |
| أختبار القبله ما أتنقل على يدي |
عيوبها , أول عيب طبعا أنها سهلة الكسر لو طاحت طيحه جامده يعني أنا واحد منهم مرحوم طاح من الدور الثالث و راح فيها فا أنتبهوا , الثباات الصراحه ماهو 24 ساعه يعني يجلس ساعتين كده و أول مكان يروح منه نص الشفايف الي تحت و يبدأ يبان لون شفتك من جوا اذا فهمتوا علي , فا يعني أنا أثق فيها و أحطها لمن يكون عندي جلسه طويله بس أنه أعيد عليها بس الأعاده حقها سهله يعني من غير مرايا ممكن أعيده لاني حفظت المنطقه الي يروح منها , بس بالنسبه للسعر أحس دا الي ناخذه بس ماهو عيب قوي يخليك ماتشتريها لانه الوانها تخليك تنسي كل العيوب الصراحه .
و عني راح أشتريها مره و اثنين و ثلاثه و بالاخص الألوان الفاتحه بالذات رقم 38 , غير أنها خفيفه و حجمها صغير تشيلي 4 منها و شنطتك ما تنزحم , و أكيد أنصح فيها لأنه أحسها بديل أرخص لأرواج ميك اب فور ايفر المطفيه من ناحية الالوان .
 |
| سواتش أرواج باليتا |
التقييم /
A
No comments:
Post a Comment
لأي استفسار أتفضلوا...®