بسم الله الرحمن الرحيم
اليوم الريفيو عن مجموعة عنايه جدا مشهوره من كلينيك بس ماتجي مجموعه هي ممكن تشتريها منفصله بس اسمها الخطوات الثلاثه انه مرتبينها لك بالارقام و مين قبل مين , اكثر شي كنت متحمسه له في دي المجموعه انها مقسمه لكل نوع بشره في تونر و كريم خاص فيها و كمان احجام مختلفه , و طبعا انا اخترت الخاص بالبشره الدهنيه , سعرها كان كلها 370 ممكن اخذتها من المطار بدبي و عليها عرض للحجم الكبير , فا يلا نتعمق فيها و نشوف تقييم كل منتج على حدا .
اول شي الكريم المرطب جدا مشهور و قوامه لانه للبشره الدهنيه فا قوامه جيل يعني خفيف و مايدهن و بالضبط هو خفيف و مايدهن و تمتصه البشره بسرعه , بس مايرطب مره وهو شي كويس للبشرتهم دهنيه مره بس انا بشرتي دهنيه مختلطه فا عندي اماكن جافه احتاج ترطيب اكثر , و احلى شي فيه لاحظته من اول استخدام تخلي بشرتك مخمليه و ناااعمه , اول مرات طلعلي حبوب صغيره بيضا بس بعد كده صار عادي , طبعا مو معطر و الماركه طبيه و عجبني الكريم و كميته جدا كبيره و مناسب جدا للبشره الدهنيه لانك حتقومي ثاني يوم و بشرتك مافيها زيوت كثير , لكن انا ما اتوقع بشتري ثاني لاني احتاج ترطيب اقوى لكن انصح الي بشراتهم جدا دهنيه يجربوا .
التونر مره مايحسس البشره و يسحب كل الدهون في البشره و تحسي بانتعاش بعده و خفيف جدا , بس ماحسيته ينظف كويس يسيب مثل اثر و احساس كده على البشره مدري كيف اوصفه يعني تحسي في ترسب على البشره حتى بعد ماينشف , هذا لحد الان ماخلص و ماحبيته مره اقل واحد بالمجموعه ابدا ماافكر اشتري .
غسول الوجه يجنن يشيل كل بقايا المكياج من البشره و خفيف على البشره تقدري تستخدمي مرتين باليوم و ماتحسي انك نشفتي وجهك ( مع الترطيب بعده اكيد ) و كمان مرات اشيل فيه المكياج من اساسه و ينظف تمام و يشيل كل شي , مره حبيته و خلصته في وقت قياسي , انا مو دايما اخلص غسولاتي اطفش و ابدل بينهم بس دا عجيب مره , يعيبه انه فيه كحول فا ممكن بعض البنات محا يناسبهم دا الشي فا حبيت اقلكم .
بشكل عام المجموعه يمكن من كثر مااسمع عنها توقعت نتائجها سحريه يعني بالنسبه للسعر مااحس تستاهل و ماشدتني اني اجرب منتجات العنايه الثانيه من نفس الماركة حسيتها جدا عادية , يعني لو حبيتي تجربيها ممكن تاخذي الحجم الصغير , بس عني و راي الشخصي ما راح انصح فيها الصراحه يعني عادية فيها اشياء حلوه بس عادي ممكن تلقيها بماركات ثانيه .
التقييم /
C
No comments:
Post a Comment
لأي استفسار أتفضلوا...®