بسم الله الرحمن الرحيم
اليوم بتكلم عن بعض المنتجات الس جربتها من بيزلين و اشهرهم هي هذه الظروف كنت افكرها الصراحه فقط ماسكات و كانت مشهوره في انستقرام شهره كبيره و كنت جدا متحمسه اني اجربهم , بس طلعت الظروف متنوعه سنفرة جسم و ماسكات وجه و شعر فا يلا اعطيكم ريفيو بسيط عن كل واحد .
صنفرات الجسم
هذه الصنفره لونها وردي فاتح من جوا , تعمل تقشير للجسم و تعطي نعومه جميله و ريحتها كانها لبانه و حلويات تجنن , اهم شي لا تخلي جسم مبلل مره خلي ندي و سويها بحركات دائريه , الصراحه رهيبه و انصحكم تجربوها و انا برجع اشتريها لو في منها حجم كبير 100% بشتريها , بس واحد ظرف مايكفي جسم كامل ممكن .
هذه الصنفره عجيبه من جوا كانه فيها شوفان , ريحتها مو مره عجبتني و فيها زي الكريم مع الحبيبات الشوفان ههه ( من راسي شوفان ) و دي الحبيبات هي الي تسوي التقشير , الي لاحظته انه اتشال طبقة من الجسم و بيضت طبعا بياض نظافه ههههه , و كمان
تنعم الجسم مره بسبب الكريم , و بالاخير بعد ماتوزعي السنفره خليها شوي على جسمك عشان الكريم وو بعدها اغسليها .
هذا ماسك كريم للشعر , مره يرطب الشعر و يخلي فيه حيويه , احس بالسفر لو انك رايحه بحر او تتعرضي لشمس و شعرك ينشف خذيها معاك ظرف سهل الحمل و يخلص في وقتها , و برضو ارجع اشتري عجبني .
ماسكات الوجه
ماسك لللرؤوس السوداء , للامانه ابدا ماحبيته صعب الشيل و يعور لو عندك شعر صغير , و يحسس البشره للبعض , هذا مره ماانصح فيه ولا حتى شال الرؤوس السودا و لا يعطي نظافه ولا شي لين دحين موجود ماخلصته حاولت بس ماقدرت ههه .
هذه الماسكات للبشره تقدري تحطيها بعلبه و تقدري تستخدميها اكثر من 5-6 مرات هو و الي بعده , مو مره حبيته هذا هو تحطي على بشرتك ربع ساعه و بعدها تفكري على بشرتك و خلاص تنامي فيه مايتمسح , بس مدري اعطاني شعور مدبق كده و يحرق لو كثرت منه , فا حطوا طبقه بسيطه لو كان عندكم .
هذا الماسك قوامه زي الطين , تحطي ربع ساعه و يبدا يتحجر حلو بس يحرق ماانصح الي بشرتهم حساسه يجربوا مع انه منتجاتهم طبيعيه بس مدري ليش يحرق , بس الحراره تكون لمدة دقيقتين هذه عادي لو زادت مسحي بسرعه , حلو و تحسي بنظافه و انتعاش بعده بس له بدائل كثير فا مااحرجع اشتري .
هذا ماسك تسوي لمن تبغي ترفهي عن نفسك , ماسك شيت زي مو واضح بالصوره يعني يتحط على الوجه قناع و تشيلي الي يميز هذا الماسك عن الشيت ماسك الباقيين انه هذا يكمل للرقبه و هذه حركة جدا حلوه و جديده ماقد شفتها , و طبعا يعطي نضاره و حيويه للوجه و شد للبشره , ممكن تخلوا امهاتكم يستخدموا اشوفه جدا مناسب سوي لها يوم كده خاص فيها و حطي لها ,
بالاخير الظروف هذه جدا مناسبه للطلعات و السفرات بشنطتك ممكن تحطيها انا اشوفها جدا عمليه , و للسفرات اليوم الواحد او اليومين و ترميها , جدا انبسطت بتجربتها كلها و طبعا منتجات بيزلين جدا مشهوره تلقوها بالصيدليات و السوبر ماركت كلها بالخليج و الدول العربيه , منتجاتها طبيعيه و كلها يدخل فيها العسل و شمع النحل , و سعرها جدا مناسب ممكن 11 ريال للظرف و بعض المرات يكون عليها تخفيض , ان شاء الله تكونوا حبيتوا الريفيوهات الصغيره هذه و اذا جربتوا شي تحبوا اجربه مو محطوط بالريفيو اكيد احب اسمع منكم سيبوا في كومنت تحت .
التقييم /
A
No comments:
Post a Comment
لأي استفسار أتفضلوا...®