السلام عليكم و رحمة الله و بركاته
اليوم حبدأ سلسله جديده و هي أشياء خلصتها حتكون ريفيوهات مصغره لما أتذكره عنها لأنه بعضها جدا قديم , حقسمهم قسمين عنايه و مكياج , لا تنسوا تكتبولي تعليقات هل تحبوا مثل هذه الموضوعات ولا لأ , عشان أعرف أعيدها ولا لأ .
كريمات العين
ايستي لودر / أشتريته لمن كان عندي جفاف في منطقة العين خصوصاً لمن أضع الكونسيلر و البودره و حل لي هالمشكله بس سعره غالي فا لمن ترجع لي المشكله حرجع أشتري شي غالي , تلقوا ريفيو كامل عن مجموعة العناية من ايستي لودر هنا / أرميها .
غارنييه / ما حسيت منه شي و أحساسه كأنه مويه على البشره مو سيروم يتغلغل ببشرتك ما حبيته / أرميها .
---------------
كريمات الوجه
شانيل / عينه و ما حبيته توزيعه صعب و معطر , ريحة العطر قويه فا لمن يكون عندي حبوب أخاف أحطه فا أكيد ماراح أشتري عبوه كبيره منه / أرميها .
سيروم ايستي لودر / سيروم مثل الزيت الخفيف أنا بالنسبه لي هذا المنتج سحر , رااائع بالذات للبشرات المتقدمه في السن , طبعا للبنات فوق 25 سنه قبل كده بشرتكم ما تحتاج أحس / أعيدها و بقوه .
كريم الوجه من ايستي لودر / معطر بس ريحته حلوه و كنت أحب أحطه لمن أنام أفتقدت ريحته بعد ما خلص بس كا ترطيب في كثير أحسن منه / أرميها .
كلين أند كلير / 3 علب أستخدمت منه حقيقي مريح و ترطيبه متوسط بما أنه بشرتي مختلطه ما احب الكريمات الثقيله جدا , فا هذا جدا مناسب كاستخدام يومي و سعره حلو/ أعيدها .
اولاي / ما حبيته أستخدمته أنا و أمي و الاثنين ما حسينا بأي تغير حتى لو نقطه و سعره مو رخيص / أرميها .
-----------------
كريمات الجسم
زبدة الجسم من سيقورا / جمييله حقيقي تغلف الجسم و تعطي نعومه حبيتها جدا أكثر زبده حبيتها لحد الان ريحتها شويه على خيار بس الاحساس يطغي على الريحه / أعيدها .
لوشن من سيفورا / ما حبيته أبداا قوامه مثل الماء خفيف جدا و ما يرطب و أحساسه ماحبيته على جسمي / أرميها .
لوشن من بودي شوب / جميل و ريحته مره جميله / أعيدها .
فازلين / خلصت كل الأحجام الموجوده وهو ضروره لازم تكون في كل منزل و احسن شي أنك تبللي رجلك و تحطي و تلبسي شراب و أستمري عليها تلاقي نعوومه في رجلك / أعيدها .
لوشن فيري سيكسي من فيكتوريا سيكرت / ما حبيته الصراحه و ريحته ما حبيتها مع أنه أهلي مره يحبوا / أرميها .
كريم للجسم من كارولينا هيريرا / أنا مو مره صحبه مع الكريمات حق الكلونيات لأنها مرات تكون جدا قوية ريحتها تقوم تقلب عكس عليك فا ما حبيته و حسيته غير عن ريحة الكلونيا / أرميها .
كريم للجسم من ألزبيث أردن / ما طيقته و للاسف جاني هديه مع العطر مرتين , كأنه ماء و ريحته وحشه بعكس العطر الي ريحته جدا جميله / أرميها .
كريم بلمعه من بودي شوب / هذا النوع من الكريمات فقط أحطه لمن ألبس قصير أو يدي باينه يعطي لمعه بسيطه و حلوه , ريحته بالبدايه حلوه بعد كده تبدأ تطفشني و تجيب لي الصداع , بس حجمه جدا كبير و جلس معايا فتره طويله / أرميها .
كريم بلمعه من فيكتوريا سيكرت / جميل يدي ترطيب و لمعه للجسم ريحته عاديه شويه قويه بس مع الوقت ما أحس فيها , حجمه متوسط يعني ما طول معاي كثير / أعيدها .
--------------------
عطور
عطر للجسم من باث أند بدي وركس / جميل يذكرني بوقت النوم لانه دايما أحطه قبل ما أنام ريحته بين الكلونيا و الحلويات بس مايل للحلويات اكثر و أنا أحب ريحة الحلويات ريحته ما تطول على الجسم , و يذكرني بسفرتي لأمريكا فا أحبه / أعيدها .
-----------------
الشاور جيل
سيفورا / جميل جميل جميل جميل أتعب أقول جميل حقيقي كل الحمام يصير من ريحته و كأني في أجازه صيفيه بحريه جميله , يعطي رغوه كثيفه كميته كبيره , شكله حلو , لونه أزرق لون البحر و لوني المفضل , كل شي فيه حلو , لين الان ما لقيت شاور جيل يخلي حمامي كله ريحته فا أكيد أكيد / أعيدها .
باث اند بودي / حلوه ريحته لكن ما حسيت يطلع رغوه كثير بس مناسب حجمه للسفر / أعيدها .
لوشن للجسم من باث اند بدي / دخل بالغلط هههه بس جميل نفس ريحة معطر الجسم , و ترطيبه حلوو / أعيدها .
فيكتوريا سيكرت / تابع للوشن الي بلمعه و برضو فيه لمعه بس ماهي قويه و ماتجلس كثير على الجسم / أرميها .
ألزبيث اردن / ما حبيته كأنه كريم و مايطلع رغوه غير لمن تحطي ليتر كامل منه و ريحته سيئه و تدوخ , عطر عزيمه تحطي في الحمام ما يصلح و لو كل يوم حقيقي يجيب الصداع / أرميها .
-----------------
عناية الشعر
بخاخ حماية الشعر من الحراره من ترسمييه / أنا حبيته ما حسيت بأي مشاكل معاه , لكن أخواتي لمن يحطوا مره يزيت شعرهم و ما يمسك السشوار ولا الفير على طول في بداية السهره تنفك كل اللفلفات و كم مره جربناه مع و من غيره فرق كبير / أعيدها .
كريم للشعر من صانسيلك / كريم ممكن تحطي قبل الاستحمام لمدة ربع ساعه و تغسلي أو تحطي بعد الاستحمام كميه بسيطه أو بعد السشوار , و في كل الحالات كان جميل صح ما يدي نعومه زي الزيت بس الكريم أفضل للشعر المصبوغ من الزيت لأنه الزيت ينشف و يغمق فا اتذكروا هذه المعلومه , و أشتريت منه ثاني ^^ / أعيدها .
شامبو جاف من باتيست / مناسب للشعر الدهني ينظف الشعر من الزيوت و يرجع الحيويه في دقائق للشعر حقيقي يعتبر معجزه , هذا النوع ريحته جوز الهند مناسب للصيف بس بعده غيرت الريحه و جبت وحده أخف , في كمان للشعر البني لونه غامق / أعيدها.
-----------------
غسولات الوجه
كلين اند كلير / ممتاز للبشره الدهنيه و المختلطه بس أستخدمه مره وحده بالاسبوع الى مرتين غير كده مره حينشف الوجه , ما سبب لي حساسيه ولا طلع لي حبوب / أعيدها .
أولاي / حسيت يطلع لي حبوب شويه , بس ريحته حلوه / أرميها .
بوتانيكا أتوقع كدة تتنطق / فااشل تقشيره خفيف , لمن حاولت أشيل المكياج معاه ماشاله مضبوط فا يعني تنظيفه أحسه سطحي ما أحس وجهي يلق بعد ما أستخدمه و الماركه بصفه عامه ما اتوفقت معاها أشتريت 3 أشياء و كلها وحشه / أرميها .
----------------
عناية اليد و القدم
أفون / كريم للقدم جدا قديم عندي الي احبه فيه انه فيه ريحة فيكس فا لمن أحطه يديني بروده و كويس تحسي يغلف الرجل بعد البدكير بس ممكن ألاقي أفضل / أرميها .
كريم لليد من باث اند بدي وركس / هذا الكريم له ملمس عجيييب حقيقي يعطي ليدك نعومه في ثواني و تحسيها ملبسه بحرير , ريحته جدا حلويات كده ما حبيتها أبدا جربوا في المحل قبل ممكن أدور رائحه ثانيه / أرميها .
----------------
جيل حلاقه
من بوتس / طبعا بما أني كنت أبغى أبدء في الليزر فا بدأت أشيل موس من قبلها بفتره و هذه الرغوه جدا سهلت الحلاقه و تخلي الموس يعيش أطوول و ريحتها تجنن بالذات المشمش تعبي الحمام ريحته / أعيدها أصلا واضح ههه .
سوبر ماكس / من الصيدليه أخذتها بس ماعجبتني و تخلص بسرعه / أرميها .
----------------
تونر للوجه
نيفيا / جدا لطيييف و ريحته حلوه , بس ينقي و من هذا الكلام ما حسيت بس / أعيدها .
غارنييه / ريحته تجيب الصداع قووويه و هو قوي كمان , مخصص لإزالة اللمعان الي كنت أعاني منه و جدا فادني و لاحظت فرق كبير الصراحه و أنصح فيه خصوصا في فترة الصيف / أعيدها .
--------------------
مزيلات المكياج
لورايال الصراحه بديل أرخص لبيودريما تلقوا ريفيو كامل عنه في صفحتي على انسقرام اسمي ( Raneem_Ism )
لورايال / خفيف ما حسس لي عيني يشيل المكياج كويس بس تحتاجي كميه منه , عيبه حجمه الصغير يخلص بسرعه / أعيدها .
بايوديرما / من أفضل المزيلات كأنه مويه مافيه ريحه بس طعمه مر هههه , يزيل كيلو المكياج في دقيقه قطنه وحده تزيل المكياج من العينين , أستخدامي يكون بوضع كميه في القطنه و الضغط على العين لمدة دقيقه ثم إزالته و أقلبها و أحطها للعين الثانيه / أعيدها.
نيفيا / انا مو صحبة مره مع الحليب المنظف بس هذا يعتبر كويس من ناحية أنه ما حرق وجهي بس / أرميها .
جونسون / جدا جدا جدا سيء يحرق الوجه و العين بشكل مو طبيعي حقيقي بعد ما أمسحه وجهي يصير أحمر فا لازم بعدها أغسل وجهي بغسول و مويه فا ما حبيته أبدا / أرميها .
------------------
التشميس
سيلف تان سيفورا / جميل لونه لو كنت سمراء لكن البيضا بيطلعها برتقاله , ريحته حنه و تبان من متر للاسف , ما ينفع للمبتدئات لأنه ممكن يحوس و يبان بقع فا لازم تكوني متعوده حتى توزعي عدل و باين أني استخدمته كثير بس لقيت الي أحسن منه الان / أرميها .
بنانا بوت / أفضل زيت تشميس جربته و أتوقع ما راح الاقي مثله رخيص و يعطي لون حلو أيش في أحسن من كذا / أعيدها .
------------------
عناية شخصية
باث اند بدي وركس / من أجمل روائح الصابون بس غاليه فا أشتريها وقت التخفيضات فقط / اعيدها .
معجون أسنان من ثيراميد / حقيق ما أتوقعتها منه بعد فتره لاحظت أسناني بيضت شوي يعني ممكن نقول بيضت درجة بس لاحظت فرق و دا أول مره أشوفه في معجون حتى كرست ما سوا كذا / أعيدها .
ليسترين / عادي زيه زي أي منظف فا ما يفرق / أرميها .
-----------------------
و بس وصلنا للنهايه ان شاء الله تكونوا حبيتوا الموضوع هو طويل حبتين بس له سنه بيجمع , و انتظروا جزء المكياج ان شاء الله .
No comments:
Post a Comment
لأي استفسار أتفضلوا...®