السلام عليكم و رحمة الله و بركاته , اليوم تدوينه تعتبر شيقة بدأت أخرج من أطار الريفيوهات لانكم حسيتكم تحبوا المواضيع العامه و الشامله تكون تعليميه اكثر من أنها تتعمق بمنتج معين , تدوينتنا اليوم عن أكثر شي مسبب جدل في عالم التدوين بين مؤيد و معارض , و بين انه اصلا ناس كثير ماتعرف ايش هو البرايمر من أساسه , فا ححاول اغطي أكثر الاسئلة الشائعه من وجهة نظري انا , و راح أوريكم انواع البرايمرات الي انا أستخدمتها و ليش أخترتها , لاني أبغاكم تخرجوا بعد هذا الموضوع عارفين و مايكون عندكم حدود معينه و تعرفي تختاري الي تحبي .
أول شي ماهو البرايمر ؟
في نظري البرايمر وجد لحاجتين , أولاً أنه يحل مشكله في بشرتك بشكل تجميلي و مؤقت طبعا ( مسام , أحمرار , هالات و تصبغات ... الخ ) و الحاجه الثانيه الي هي نوع بشرتك و شكلها العام ( جفاف , شد للوجه , ترطيب , نضاره , مطفيه ) .
هل تقدري تستخدمي كم نوع في نفس الوقت ؟
أكيد طبعا , البرايمر وجد أنوع حتى تلعبي فيه بحسب حاجتك فين عندك مسام تحطي حق المسام في المناطق المخصصه بقية الوجه عندك جاف تحتاجي برايمر مرطب و هكذا يعني حطي كل برايمر في مكانه المناسب .
هل البرايمر ينحط على كامل الوجه ؟
طبعا يخاف على حسب نوع بشرتك و مشاكلها , مثلا لو كانت بشرتك مختلطه يعني حيكون فيها مناطق جافه و فقط التي زون هي الي تدهن فا راح تحطي برايمر مطفي فقط في منتصف الوجه محل مايدهن و باقي الوجه ياتستخدي برايمر مرطب أو تتركي , مثله مثل المسام راح تحطي برايمر للمسامات فقط محل مساماتك الانف و الخد و هكذا .
ليش حجمه صغير مو مثل الاساس ؟
بعضهم يكون كميتة مثل الاساس مثل برايمرات سماش بوكس , و بعضهم يكون صغير لانك راح تحتاجي منه كمية جدا صغيره عشان كده .
أنواع البرايمر ؟
لكل بشره سواء الجافه او الدهنيه , لكل المشاكل اللونيه اسمرار او أحمرار أو تصبغ أزرق او اخضر , و في الخاصه بالتان و اعطاء اللون البرونزي , يعني متعدده أشكاله و أستخداماته .
هل مهم استخدام البرايمر ؟
في نظري مهم طبعا لانه يكون طبقه تحمي بشرتي من كتل الاساس و الكونسيلر و البودره فوقه , غير انه يخلي الاساس ينحط بسلاسه فوقه .
الان راح أعطيكم لمجة بسيطة عن بعض البرايمرات الي أستخدمتها و جربتها بنفسي و الغرض منها
برايمر بورفيشنال من بنفت
هذا البرايمر أستخدمه فقط في المناسبات الجدا جدا سعيده أو يكون عندي اجتماع مهم و أبغى بشرتي تكون صافية , أضعه على الحبوب و المسامات حتى يخليها ملساء بس ما أكثر منه و أزعه باصباعي عن طريق الطبطبه في الاماكن الي تحتاج فقط و ابتعد عن الاماكن الجافه في بشرتي .
برايمر ترطيب من سماش بوكس
رائع هذا البرايمر كتبت عنه تدوينه كامله هنا غرضه كان أنه بشرتي دهنيه فا لمن أحط كريم مرطب حسيت أنه يخلي الاساس مو ثابت فا أخرت أحط برايمر مرطب حتى يكون خالي من الطبقة الزيتيه , و أضعه بفرشاة الاساس او اليد على كامل الوجه .
برايمرلاحمرارالبشره و تعبئة التجاعيد من سماش بوكس
هذا البرايمر مناسب للبشرات الكبيره شويه في السن حتى يعبي و يشد الوجه بشكل طفيف و مناسب , يحتاج قبله كريم مرطب ضروري و مكتوب عليه اصلا في التعليمات و أستخدمه على كامل الوجه مكان التجاعيد و الاحرار على الخد و الذقن و الانف غالبا , أوزعه بفرشة الاساس او اليد .
برايمر مطفي من بورجوا
كتبت عنه تدوينه كامله هنا , أسخدامي له واضح حتى يحبس الدهون و يخلي بشرتي مطفيه وقت أكثر أركز على التي زون مكان التدهين أكثر شي , و أوزعة باليد على مساحات صغيره .
برايمر بلمعة من بيكا
هذا البرايمر قصة عشق , لاي بنت تحب بشرتها تتوهج و تكون قلوي و نضره تستخدمه تحت اي أساس حتى لو كان مطفي , يعطي لمعة جدا راقية من دون مايدهن الوجه لانه أنا بشرتي مختلطه فا ابدا ماابغى شي يبين كا طبقة زيت لكن أحتاج لمعة بسيطه و هذا البرايمر يعطيني هي , أوزعة بأسفنجة البيوتي بليندر مبلله .
No comments:
Post a Comment
لأي استفسار أتفضلوا...®