بسم الله الرحمن الرحيم
السلام عليكم و رحمة الله و بركاته , حبدأ معاكم سلسلة تقييم لمنتجات انستازيا , الماركه لسه أول مره أجربها و أخترت أجرب كم شيء منها لقوتها في انستقرام الصراحه تخليك تبغي كل شيء , فا بصفه عامه الماركه تستاهل التجربه ماركه عارفه احتياجات السوق و بتطور منتجاتها لتنساب محبين المكياج و في نفس الوقت عمليه بطريقه تعطيك الي تحتاجي كا بنت عاديه أو محبة للمكياج .
راح ابدأ زي ماطلبتوا في انستقرام التصويت الاغلب كان عن الروج , الروج أخذته من أمريكا سيفورا , درجته Pure Hollywood , سعره 20 دولار / أمريكي , مصنوع بأمريكا , صالح لمدة 6 شهور ( أشوفها مده جدا قليله الصراحه ) .
أول شي بعطيكم نصايح في استخدامه حتى ماتكرهوا مثلي أول ماتجيبوا , أول شي أفتحوا و خلوا فتره حتى ينشف شوي لانه يكون جدا سائل بالبدايه , ثاني شيء ققلي الكميه المحطوطه على الفرشه حقه لانه بيحط كميه كبيره و دا حيتعبك في التوزيع , بعدها نجي لمميزاته , كريمي جدا , يلون كامل الشفاه من اول طبقه , مريح جدا على الشفاه ابدا ماينشف و يصير مشدود أو تحسي أنك تبغي مرطب لا بالعكس كأنك مو حاطه شي ابدا خفيف خفيف أخف روج سائل مطفي جربته لحد الان , ضد الماء , علبته جدا سلسله و مبين من وزنها أنها مو لعبه , الفرشه حقه معرف ايش اسمها قطن ولا ايش ههههه بس مريحه في الاستخدام حجمها متوسط , من احلى مميزاته تنوع الالوان كثيير الوان و درجات مختلفه , و الحلو في اللون الي عندي لو دمجتي مع اي روج يطلع حلوووو .
عيوبه , لو كثرتي منه راح تحتاسي وين توزعي فا راح يطلع برا شفايف ( مو يسيح بس أنه كميه زايده ) فا حطي طبقه متوسطه زي ماذكرت سابقا , لو كثرتي منه كمان مع الماء راح يتقشر بشكل غريب يصير بقع فيها روج ومكان لا بس الحل انك تحطي طبقه بسيطه , ثباته بشكل عام من دون أكل و شرب ثابت بس يروح من جوا شوي , لكن لو أكلتي أو شربتي يروح طوالي و هو شيء يزعل الصراحه , اللون لوحده ممكن يناسب مع مكياج ثقيل او البنات المتشمسات الي يحبوا البيج او البنات البيض , أنا افضل ادمج معاه بس مرات أحطه لوحده , من عيوبه كمان انه ياخذ وقت عبال ينشف فا خلي فمك مفتوح لين تحسي نشف تماما ههههه مو ساعه ياخذ بس يعني ياخذ وقت مو على طول يصير مطفي .
بالأخير الروج حلو يكون عندك لون تستخدمي دايما لانه مريح , بس مااظن أنه يحوج تاخذي كل الالوان بس ممكن واحد أو أثنين يكفوا .
التقييم /
A
No comments:
Post a Comment
لأي استفسار أتفضلوا...®